葉問徒孫兼王祖藍舅父 宣布參選特首 冼國林為推詠春拍《葉問》賺錢唔落袋

·3 分鐘文章
冼國林。
冼國林。

今年3月就係特首選舉,有傳媒收到風,電影《葉問前傳》出品人冼國林有意角逐,更甚係有報導話冼日內宣佈參選。而冼國林今早(星期三)亦喺自己社交平台正式表明參加特首選舉,並以「忠誠坦蕩,仗義擔當,不患得失,赤誠報港」為競選口號。

冼國林
冼國林

65歲嘅冼國林近年成為時政KOL,但係同娛樂圈大有淵源,唔止係電影《葉問》出品人,更加做過導演、經理人,人生上上落落都十足劇本一樣。

冼國林係TVB首席創意官王祖藍舅夫,亦係亞視前高層冼偉智堂兄。人稱「冼師傳」嘅冼國林自稱武痴,自幼習武,成年後學太極、蔡李佛等武術,後來學習詠春,先後拜葉問弟子黃漢忠及葉問兒子葉準為師。本來喺金融界發展嘅冼師傅,想透過電影推廣武術,但係都被圈中人婉拒。後來冼師傅認識黃百鳴,接手對方電影公司之外,又建議開拍《葉問》。由於坊間當時對葉問認識唔深,生意拍檔對《葉問》票房冇咩信心,冼師傅決定「包底」,蝕錢會負責,但賺錢都唔會分紅,結果電影香港收2500萬,內地更加過億,並一連開拍合共四集系列電影。

冼國林
冼國林

《葉問》令男主角甄子丹人氣反彈,原來呢個選角決定都係同冼國林有關。冼師傅話開拍前有人提議劉德華同梁朝偉,而佢希望演葉問嘅演員要打出詠春感覺,不過劉德華冇時間學,而梁朝偉就接咗王家衛嘅《一代宗師》。黃百鳴同冼師傅提議搵甄子丹,但係好多師叔伯唔贊成,認為甄身型太壯。冼國林睇完90年代楊紫瓊同甄子丹主演嘅港產片《詠春》之後,發現甄嘅文戲演得好,於是拍板搵甄子丹做葉問,但開出條件要甄子丹學半年詠春、減肥同埋研究葉問形象。而「丹爺」亦好肯下苦功,出埠都帶埋木人樁練習,結果效果十分好。

冼國林唔止做出品人,更以60歲之齡首次執導電影《我們的6E班》。冼師傅亦都係藝人陳嘉桓經理人兼武術師傅,二人關係密切,2011年陳嘉桓喺內地拍戲被飲大兩杯嘅陳浩民同馬德鐘輕薄,有傳冼師傅相當火滾想幫手出頭。另外冼有份投資開拍《葉問前傳》,仲搵旗下武打演員杜宇航演年青葉問,但係後來二人因合約問題不歡而散,杜宇航更被逐出師門。

冼國林
冼國林

2018年冼國林到韓國參加朋友生日party,期間感到身體不適,返港後發現左眼球受細菌感染,需要切除保命。

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!