葡萄友：有樓真係萬事足？千奇百趣儲錢方法

做樓奴要有嘅覺悟，香港嘅樓價已經去到一個難以負擔嘅程度，所以大台尋日新出街嘅節目《有樓萬事足》就令人好容易代入之餘，加上節目入面嘅主角個個都非常「特別」，話題性夠哂。除咗之前已經搶閘出位拜金女嘅高潮金句之外，另外嘅主角仲有自稱儲錢儲足105%，衣食住行都洗男友錢嘅女文員、慳錢慳到極致教過書嘅男人，曾經堅持過每日只係用50蚊，「善用」學校資源同唔亂咁使錢儲足8年錢買樓。要做樓奴真係要各出奇謀，辛辛苦苦先可以有個屬於自己嘅安樂窩，但俾著係你又願唔願意咁樣犧牲法？

打多份工

想要儲多啲錢好簡單姐，打多份工囉，但做多份工唔容易架，每日份正職收工個人已經好累啦，仲要再做嘢真係要好有毅力先得，而且仲要小心畀其他同事發現報個串咁就好麻煩啦。

唔去旅行

香港人都好鍾意去旅行，唔少人一年至少都去兩三次添。就算畀你禁到平機票，去旅行食、住、買始終都要用錢，無辦法就住就住。如果要計到咁足，去玩都玩得唔過癮啦。

減價掃平貨

有嚴重買嘢癮嘅朋友要慳，惟有就係隨時留意住邊到買野平同有折，做到貨比三家，無論係買衫定係買餸，總之見到邊到抵就去邊買，仲可以趁平嘅時候入定多啲添。

斷絕社交

要慳錢儲起佢，最快嘅方法就係唔使錢。即使有朋友約出嚟食飯飲嘢唱K，都一一扮唔得閒或者約咗其他人推咗佢，其實就係屈係屋企邊到都唔去。雖然錢就慳到，但係最後朋友慢慢都會愈嚟愈少，好大犧牲喎。

相片來源：TVB.com網上截圖