葡萄友：特朗普逼走無貢獻新移民 香港網民讚好？

「狂人」特朗普上任後美國總統，成為美國最唔受歡迎嘅總統之一，因為佢極右嘅政策，被形容係挑起種族歧視及民族仇恨。繼早前宣布收緊對中東國家嘅入境政策之後，仲有傳草擬緊新行政命令，針對美國新移民，禁止所有需要以社會福利維生嘅移民個案，就算已經得到居留權嘅新移民，只要5年內用咗一定程度嘅社會福利救濟的話，就會遣返原居地。特朗普表示：「移民制度本意係保護美國納稅人。」至於另一項草擬中嘅條例就係針對工作簽證，禁止大量外國人以工作簽證去美國，搶走美國人飯碗。無疑特朗普絕對係右翼思想嘅表表者，批評者雖然多，但不得不承認呢種「美國人優先」嘅政策又確實大有擁護者。唔少香港網民得悉之後仲嘆咗一句：「很想要吧！」因為原來將政策放諸香港，其實都幾啱用。

拒絕拎福利新移民
香港每日150個新移民配額，根據數字原來過去5年嘅新移民數字就已經超過咗每日150個呢個數添。好多新移民一落香港就係排公屋，拎綜援，日日飲茶，係咁生仔，對納稅人又公平咩？

禁止不合適工作簽證
特朗普禁止一啲所謂「外勞磁石」嘅工作，表明職位應該以本地人優先，一方面可以確保本地人優先就業，另一方面禁止外地人以工作簽證作長期居留，最後更取得居留權永久逼留。

打擊旅遊生B
特朗普其中一個政策係要嚴厲打擊外國人借旅遊之名義到美國生仔。香港雖自取消雙非配額後，雙非個案大減，不過仍然偶有大陸人暗中過境香港待產。要打擊，除咗嚴厲檢查入境孕婦之外，治本方法係要更改「本地出世就有身分證」呢條例。

圖片來源：micdotcom@tumblr