葡萄友：畀七萬蚊跟杜如風去日本？我點解唔跟蔡瀾？

過年去旅遊就預咗貴，不過無辦法啦，今年係連埋星期六、日，唔少家庭又有出外避年嘅習慣，所以一向都有價有市。今年新年嘅旅行團就有新焦點，因為當中有一個最平賣7萬，Business賣9萬嘅日本團！呢個團嘅賣點係「杜如風」，呢位日本通在陣，仲保證帶團友食最好住最好，呢個「堅離地」旅行團一出，聽聞只剩幾個位！你可以話：「嘩唔好去搶！」杜如風呢個價仲貴過蔡San，而且今次仲係第一次帶團已經收到咁貴。唔少網友就話零興趣，似乎就唔多Buy喎。其實佢精通日文，出過咁多書拍過咁多節目，理應有真材實料（好似係），點解大家仲係覺得好唔值呢？

惡搞惹禍
對上一輯電視台節目之中以筷子扮香咁插落飯到，令人覺得佢唔尊重日本文化，仲要喺店內一邊食一邊大彈食物難食，行為唔大方亦唔成熟，似足小朋友，由佢帶隊，你又有幾大信心呢？

口齒不清
唔少人都同意杜如風講嘢一嚿嚿口齒不清，停頓位又奇怪，需知道作為領隊及導遊，介紹景點實屬非常重要。如果以杜小姐一貫做節目嘅方式嚟睇，又真係不禁令人覺得「跟呢個導遊，聽得一定好辛苦。」

無新意
一向睇開杜如風節目都知杜小姐介紹嘅都唔係咩隱世旅遊點，都係其他旅遊書或網站一早已經介紹過，稍為會做啲Research先去旅行嘅朋友應該一早知道晒。參加得佢個團，唔好奢望可以嘗鮮喇。

性價比極低
呢個日圓低水嘅時勢，去日本玩一定要夠平先抵，以呢個最平7萬蚊嘅豪華團呢計性價比極低，當然你可以話貴在同杜如風一齊嘛，先唔講呢樣係咪值先，不過跟過名人團嘅朋友都應該知，所謂隨團明人通常只會喺食飯時先出一出嚟架咋。