葡萄友：網上流傳 HR呼籲僱主小心屯門90後

大家一定有聽過「屯門？有無牛架？」呢個老土到不行嘅爛Gag，不過去到2017年，再講呢個Gag都畀人笑啦；話晒新界西愈嚟愈發展得完善，基本上基建、交通、住屋等質素都大大提升，如今再講呢區域性歧視嘅說話，未免太落伍喇！

不過近日竟然喺某一大學嘅Secret Page之中，有人出Post話自己阿媽係做HR，同佢講過有關屯門90後嘅印象喎，原文如下：「媽咪做HR好多年，閱過無數Profile。佢話見工呀成績呀果D其實都冇乜所謂個個差唔多，有時靠彩數。不過全行都知道有一類型既人要小心，就係住屯門嘅90後。佢地係社會上較次等嘅一群。住屯門多數有幾樣特徵：與世隔絕，社會冷感，基層，鄉村中學，生活單調，眼界陜窄，物質要求低，求穩不上進。我知道各位唔係僱主，但都想提醒各位識人嘅時候，對象係住屯門嘅話，記住保持距離。」（原Post於此）。

如此偏頗，將人簡單標籤化，當然引起網民熱烈反感啦，當中更加涉及眾多人身攻擊，例如「求穩不上進」、「社會冷感」等，就算並非屯門人，睇完都覺得非常不滿！事實上社會都一直有一種由上咗岸嘅上一代人聲音，指責80後、90後員工，罪名都非常偏頗，例如：

「成日掛住講錢」
上一代員工最鍾意指責80、90後員工唔挨得，一日至晚只顧講錢；好多時候更會拋出大絕「後生仔蝕底下有咩所謂？」如果後生員工一旦對薪酬有要求，就會被人話好高䳱遠，未學行先學走等下刪5千字。又唔諗下樓價年年升，人工永遠追唔上。

「成日想買樓」
另一個對後生一代嘅罪名就係想上車，然後就會阿叔上身：「當年我咪又係挨十幾年先買到層樓！」但又唔睇下究竟今時今日嘅樓價比當年升咗幾多，但人工卻只有輕微加幅，何況當年邊有咁多大陸人湧港買樓炒樓？

「成日嘈，好多負能量」
對於社會現況，上咗岸嘅一代不聞不問，不關心之餘仲要覺得年輕一代係「多事」、「唔安份」、「擾亂社會」等種種罪名；今日嘅社會環境堵塞年輕人上流嘅機會，令年輕人絕望，因此先會起來求變，負能量亦因此而起，可惜上一代人，Who Cares？