葡萄友：陳豪500萬買名校債券鋪路 贏在起跑線的星二代

唔少藝人父母都希望將最好嘅給予仔女，幫佢地鋪排好將來。陳豪係圈中嘅多仔公，同陳茵媺三年抱三，大仔話咁快已經3歲要準備搵學校，話說陳豪就花咗500萬買入哈羅國際學校嘅債卷畀仔仔讀學前班，希望拎到入場卷到時可以拉埋細佬妹一齊入讀，夠哂長遠。另一邊廂今日剛剛43歲生日嘅楊千嬅係雞年最大嘅願望，就係希望仔仔Torres可以入到好學校，咁佢就可以繼續努力工作，揚名立萬咁喎。

為人父母真係甚艱難，今時今日唔單只教育同養育仔女咁簡單，仲要不斷同人競爭，唔會輸係起跑線上。為咗贏係線上，你又會唔會跟住咁樣做？

撲學校
一間好嘅學校當然重要啦，唔單係成績上仲要有良好嘅校風，可以為家長們減少好多煩惱。所以家長們都傾向搵一間一條龍學校可以順住讀上去，又唔者唔相信港式教育就去報讀國際學校，有利將來到外國升學添，不過有時就又要有銀彈同人脈，你有無先？

上興趣班
除咗發掘仔女嘅天份之外，更重要係可以畀仔女係報讀學校時有多張證書、多樣技能，取錄嘅成數都高啲。但而家大路野好似鋼琴、小提琴已經唔夠突出，要啲好偏門少眾嘅豎琴、二胡甚至係冷門嘅語言先夠睇頭。

提前催谷
有唔少研究指出年幼時學習吸收會較快，但為咗要勝人一籌家長提早俾仔女學程度比正常年齡較深嘅野，好似低班時已經學乘法除法或者睇古典文學等等。其實最後咪又係辛苦番父母。

貼身照顧
貼身照顧小朋友不單係要佢健康同安全之外，更重要係隨時監測住個「學習」嘅進度，督促仔女唔准偷懶同掛住玩，緊貼升學schedule。

相片來源：楊千嬅 Miriam Yeung ＠facebook ,陳茵媺Aimee@Weibo