葡萄友：有種人明明係靠背景 但係都要呃自己係靠努力

1月1日每年都係樂壇最重要成績表叱咤頒獎禮大日子，今年嘅話題，就係金曲獎「我最喜愛的歌曲」，新增現場選兩強，再拉票再表演再即場投票。而兩強最後為欣宜及方皓玟，結果由欣宜嘅《女神》獲勝。不過反對聲音就開始不繼出現，除咗有唔少人炮轟欣宜繼續消費亡母消費身型（佢幾時唔係過？）就係鬧成個拉票過程極不公平，例如拉票期間強行加插黃偉文上台，大讚欣宜有幾努力，自己有幾鍾意佢等等；而從商台、DJ種種行為表演亦睇得出欣宜係幾受偏愛。當然反觀方皓玟，商台一樣係偏愛，但無論從唱片公司或者音樂人方面，撐嘅都係少數。所以今次欣宜獲獎，唔少網民話唔公平，其實鬧嘅並唔係單單一個頒獎禮咁簡單，某程度上係反映對呢個世界「識人好過識字」、「有背景大晒」呢個潛規則有幾咁討厭。你可以話咁欣宜畀人鬧係原罪，不過如果唔係呢個「原罪」，佢今日仲可唔可以企喺呢個頒獎台呢？

我有背景，驚你唔知
從頒獎禮當晚欣宜戴住亡母肥姐副眼鏡上台，而且多次提及亡母，彷彿就係要不斷話你話「我好努力，無對唔住母亡。」不過聽在其他人心，就係代表你係靠住亡母嘅人際關係、經濟支援，先可以去到呢個位；誠然有背景，錯不在欣宜自己，唔應該扼殺佢本身係有努力過，不過都無需刻意消費。

我好記仇，但我不說
欣宜係記仇的，從佢每次上台有機會講感言都知，佢係記得每一個曾經傷害過佢嘅人，但佢又偏偏表現到好大方、好唔記仇，偏偏你愈提住，其實就愈代表你放唔低。而呢一點，其實同當佢親生女一樣咁錫住嘅黃偉文非常相似，如今，你知佢哋兩位點解咁合得來啦。

我係肥嘅，肥就係靚
從唔知幾時開始欣宜放棄減肥，並且突然覺得肥就係靚，明明一個上半世人都減緊肥嘅人突然嫌棄減肥，呢個轉變令人無法適從；當然一個人嘅身型唔係咩缺點，不過佢從減肥變成「肥就係靚」呢種態度，感覺上非常刻意營造；而且整個觀點、堅持位都好難以令人欣賞，你會唔會讚賞一個人「好努力咁去肥」吖？畢竟，減肥要毅力，增肥只需要放棄。