葡萄友：請體諒住大西北嘅同事每日著到隻粽咁返工

香港近日寒流侵襲，跌到徘徊喺10度，成為入冬以嚟最低溫。凍到震，最好當然喺將自己摺埋入被竇入埋啦！不過今日星期一，始終逃唔過要返工之苦，然後大家又不知不覺開始進入一個「地區性歧視」嘅情況。

「嘩！你發冷呀？」「使唔使著咁多件衫呀？」「咁誇張！你好凍咩？」以上對白係咪熟口熟面呢？無錯，就係好多住喺大西北或偏遠地區同事都會聽過嘅問題！眾所周知，郊區及偏遠地方會比市區低幾度，大西北嘅朋友一落樓又大風又濕又凍，包到隻粽咁完全無人奇怪；但一去到市區返工，頓時升咗幾度，只見人人幾件衫瀟瀟灑灑，不禁都要回望下自己，頓覺得自己格格不入！

其實除咗天氣之外，有時候大西北同市區亦真係好似兩個國家咁，無論氣候、文化甚至語言都唔同呀！

氣候
除咗冬天溫度特別低，比市區低好幾度，市區受熱島效應影響會比較暖；但你以為夏天會特別涼快咩？少年你太年輕了，無錯，市區溫度可能比較高，而且比較焗，的確係事實，但大西北地方樓少空曠之地，直接曬住，其實體感溫度比市區要高！

時差
呢樣可以話係最大分別啦，住大西北嘅朋友每日只有20個鐘，其中4個鐘都用咗喺車程之上，即係話市區朋友瞓緊覺，郊區朋友已經出埋門口；放工人哋返到屋企煮好飯食埋睇緊電視，郊區朋友先啱啱返到屋企仲要買唔切餸是旦買啲外賣返去食！

遊客眾多
以前就話住大西北、郊區例如西貢等地，貪佢靜靜地人少少，不過宜家呢？第一，國內遊客幾乎踩塌大西北，全部商場都係拖喼遊客，踎喺萬X、屈X氏門外砌喼；至於西貢喎，直情每日大批遊客湧往郊遊，居民想坐車都要同埋佢哋迫呀！