蔡少芬老公被傳4400萬元朗買入爾巒獨立屋 上手業主勁蝕750萬離場

港府撤銷「樓市辣招」後，唔少買家都出手入市。向來買埋唔少「磚頭」嘅蔡少芬夫婦，呢期都展開掃貨行動。有報導指，同蔡少芬老公張晉姓名拼音同為Zhang Jin嘅買家，今個月中以4400萬元購入元朗爾巒一間2562平方呎嘅雙號獨立大屋，呎價約1萬7千蚊。5月中生日嘅張晉今年「入五」，未知新屋係咪買嚟慶祝50歲生日。

呢次張晉算係執到筍盤，因為上手業主2017年8月購入該物業時，成交價係5151萬5千，換言之持貨近7年埋單蝕超過750萬。而蔡少芬同張晉似乎相當鍾情爾巒，據知喺2015年底佢地已經以2600萬買入屋苑嘅獨立屋，作一家五口自住之用，而今次買入嘅單位面積更大，話唔埋係想同屋苑換樓。而爾巒嘅星級住客有吳若希、施念慈同蔡少芬好友陳法蓉。

北上搵食賺唔少，外界估計蔡少芬單喺香港至少持有共值約2億元嘅9項物業，主要用嚟收租，包括灣仔囍滙、九龍站凱旋門及何文田皓畋等。以市價計算，Ada持貨11年嘅凱旋門單位，至今估計已經升值至1700萬。蔡少芬同張晉兩公婆主力北上發展，一度舉家搬上內地住，但盛傳已經回歸香港，不過夫婦喺內地都有物業，仲據傳值4千萬！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！