蔣家旻撇甩馬子妮 入行13年終憑《欺詐劇團》擔正女一

無綫新劇《欺詐劇團》早前進行拜神儀式，劇集幕前幕後班底充滿驚喜，除咗有回巢嘅金牌監製潘嘉德之外，仲搵嚟鄭丹瑞、敖嘉年及蔣家旻擔任男女主角。首次擔正女一嘅蔣家旻，喺《欺詐劇團》飾演高冷自信嘅電影編劇李莎莎，與敖嘉年飾演嘅陳志揚有感情線。

現年31歲嘅蔣家旻，唔經唔覺已經入行13年，喺接受傳媒訪問時，佢就話17歲時係屋企人陪佢去簽約，佢覺得最困難係未有人識同工作量唔多嘅時候，因為演員好被動，而監製對自己嘅認識亦唔多。不過而家回望過去，佢就覺得每一個階段嘅體驗都好珍貴，亦好自豪自己有呢個經歷。蔣家旻由配角一步一步走到女一位置，過往佢經常喺劇集飾演主角嘅少女版或妹妹角色，當中包括《天與地》少女版葉梓恩及《愛·回家》嘅馬子妮。早幾年蔣家旻成功憑馬子妮成功入屋，乖乖女形象深入民心，不過佢嘅演藝事業未有太大突破。今年佢喺《反黑路人甲》一改以往清純形象，飾演冷艷又霸氣嘅夜場大家姐「水姐」，造型性感又惹火，角色充滿新鮮感，演技令人眼前一亮，觀眾紛紛大讚佢好戲及成功撇甩馬子妮。

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！