蕭亮被傳逝世︳TVB報幕員跳出幕前 拍《男親女愛》被指係「老薑攝石人」激嬲苑瓊丹

為TVB擔任報幕多年嘅蕭亮，今日驚傳佢3月喺加拿大逝世。多年來蕭亮嘅洪厚聲音成為生招牌，2000年回流香港並開始幕前演出，其中喺《男親女愛》飾演律師樓老闆CK最為人記得。但角色以外，蕭亮被指「老薑攝石人」嘅傳聞同樣搶眼。

當年有傳蕭亮拍劇期間，為咗佔據有利出鏡位置而攝位，甚至連宣傳活動都企正主角黃子華同鄭裕玲附近，因此被封「老薑攝石人」。劇中飾演蕭亮秘書嘅苑瓊丹據知十分不滿，甚至喺前年王祖藍主持嘅《有個閨密叫祖藍》中，苑仔被問「拍劇最難頂嘅人」時，直接回答係「蕭亮」，似乎事隔廿幾年都仲係好嬲。不過蕭亮似乎唔太介意「老薑攝石人」呢個稱號，當時甚至同李紫昕推出唱片《蕭李老薑攝石人》。

另外亦有傳蕭亮演出《阿旺新傳》時，喺劇中女兒唐寧同黃宗澤結婚嘅戲份中，懷疑因為企位問題同導演爭拗，結果導演爆粗趕走蕭亮，甚至有傳蕭亮被TVB停工6年。

近年蕭亮喺youtube開設個人頻道，分享畫作、歌唱片段甚至教觀眾法文同上海話，一個人做晒主角，唔駛攝位。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！