薛家燕跳唱Jisoo《FLOWER》開花舞 改成廣東話勁有誠意 網民：皇帝登基大典喜慶曲目一樣

韓國女團BLACKPINK成員Jisoo於3月份推出首支Solo歌曲《FLOWER》，其MV已經喺YouTube成為全球熱門音樂影片第31位，可以話係熱爆全球，更加掀起一鼓「開花舞」熱潮，世界各地唔少網民甚至係藝人都紛紛模仿拍攝影片，超級洗腦。不過，相信都未有一位夠薛家燕咁有誠意。

薛家燕於上周六（12日）與一班家燕媽媽藝術中心學員出席《家燕媽媽藝術中心暑期繽紛大匯演2023》活動，穿上鮮紅色上衣及金色褲裝亮相，並跳唱Jisoo嘅《FLOWER》，除咗神還原「開花舞」，重點係佢仲將歌詞改為廣東話，極具心思。一班網民紛紛對薛家燕嘅表演讚不絕口：「咁既年紀其實跳得唔錯」、「謝謝香港女神為我們表現出精彩的跳唱」、「其實好睇好聽」、「唔該家燕媽媽，cover多啲kpop，真係好正，好似啲皇帝登基大典喜慶曲目一樣」、「Respect」等等，仲有網民建議薛家燕不如買咗個版權佢出歌，力撐派台咁話。不過，都有網民直言有啲老土，更加有陣《皆大歡喜》嘅感覺。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！