藝人食素唔止keep靚樣 仲可以救地球？

娛樂圈有唔少藝人都係素食人士，原因各有不同，為健康為家人以至宗教原因都有。其實食素唔止係飲食習慣，仲係為地球好！根據聯合國計算，飼養牲畜佔溫室氣體排放量接近1成半，加上畜牧業需要土地，需要摧毀雨林闢地，減少食肉就可以減少碳排放，有助改善地球暖化！

一齊睇吓有邊個藝人係素食者︰

劉德華

剛剛「登六」嘅劉德華，點睇都比同齡uncle後生，甚至開演唱會仲可以晒出腹肌，飲食梗係關鍵！華仔今年初喺社交平台分享過一條食飯短片，見到佢食嘅大致上都係蔬菜同雜穀類。華仔喺另一個訪問提到，由於太太同囡囡都係食素，自己唔好意思喺屋企食肉，於是改變飲食習慣。

陳貝兒

本身信佛嘅Janis讀大學嘅時候開始食素，對點樣食先至健康甚有心得。Janis認為要食唔同顏色食材，又建議想效法食素嘅朋友要循序漸進，由少食肉開始，慢慢戒紅肉、海鮮等。Janis唔止食素，仲開埋素食餐廳，希望推廣素食好處。

方大同

Khalil跟隨父母信奉巴哈伊教，自細就未食過肉，甚至媽媽陀住佢都食素！好多人認為食素味道好寡，但係方大同不時喺IG post嘅食物相就見到佢鍾情不同地方美食，剩係麵都有好多種食法，甚至寫咗首歌《麵麵》嚟讚頌麵食。

馬德鐘

「馬神」個仔都20歲，睇到佢步入熟男年紀之後，五官同以前有少少唔同，唔通出招「變靚」？馬德鐘50歲開始食素，原因係見到爸爸有糖尿同血壓高，唔希望自己重蹈覆轍，於是跟隨太太嘅「整全植物膳食」法，一餐食6種生果同5款蔬菜，配合糙米、藜麥等有營養嘅碳水化合物，唔只營養充足，仲覺得精神好咗。「馬神」話食素之後未病過！

唐寧

16歲就開始戒食牛嘅唐寧，早幾年睇到一條關於豬農賣豬嘅片而有所體會，慢慢戒食肉轉為食素。有2個小朋友嘅唐寧，陀細女嘅時候都係食全素，醫生只係提醒要補充足夠營養就得，囡囡出世時亦十分健康。唐寧認為要俾仔女有選擇，所以冇強迫小朋友一齊食素。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！