蘇麗珊傳俾唱片公司冷待解約走人 幕前零收入靠副業糊口

曾被稱為「文青女神」嘅蘇麗珊Ceci尋日剛過32歲生日，今日就有報導指入行近十年嘅Ceci被唱片公司投閒置散，有傳佢心淡之下決定解約，而家處於「雪藏期」零收入，只能靠副業撐住。

報導指2年前簽約華納唱片嘅蘇麗珊，本來獲公司承諾一年出四五首歌，但後來華納將資源重注同公司嘅陳蕾、洪嘉豪及MC張天賦，三人已先後開過紅館個唱。前浪之餘，華納又力捧公司多位年青歌手及唱作人如湯令山、張蔓姿、Moon Tang、Kiri T、歸綽嶢等，更為佢地豪擲200萬喺香港站行人通道進行鋪天蓋地宣傳，時間正值蘇麗珊加盟冇耐，但Ceci居然無份出現廣告之中，聞說蘇為此唔開心。

夾喺前浪同後浪中間，蘇麗珊工作量下跌，造歌數量更於去年得返2隻，今年直情係0。據報導指，Ceci就此問過公司，回覆話係市道差。而報導又爆有客戶想mark蘇麗珊做嘢，但最終冇晒下文，令Cecilia心淡提出解約。而家蘇麗珊處於冇job又未走得嘅階段，預計要到出年先甩身。報導指家陣蘇麗珊靠同男友經營嘅spa維持收入，又指Ceci舊東家寰亞有意搵佢回巢。

蘇麗珊嘅情況唔係第一次見﹐同樣曾經効力華納嘅衛蘭、衛詩同林欣彤近年紛紛約滿走人，離開前都變得相當淡靜。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！