袁偉豪否認形象變差關女友事 「佢令我變得更加真誠！」

早前，袁偉豪被網民指責合照後即變樣，疑鏡頭前後兩個樣係扮大牌！日前，袁偉豪就喺Big Big Channel開直播同粉絲們互動，期間佢除咗講下《鐵探》劇情同花絮外，更再次回應近期負連如潮之事，今次佢又點講？

撰文：東方新地｜圖片：影片截圖、微博、新傳媒圖片庫

延伸閱讀：

李偉健感激事業低潮有老婆陪伴 入行10年 憑Terry一角終發圍！

家明表哥原來係佢？袁文傑現身《卡拉屋企》做大茄

袁偉豪疑扮大牌合照即變臉

話說袁偉豪最近就被網友指：「親眼目睹他的眼神表面向人微笑一下，影完即是變了這個臉。扮大明星原來是這樣，何況不是大明星。」，直斥其非大明星但就扮大牌，仲叫袁偉豪留意自己態度。

親自回覆對方

事後，袁偉豪亦有留意到該名網友對自己嘅指控，並馬上作出回應，指自己係非工作期間享受私人時間，唔想被人打擾，亦唔想令當時情況變得混亂，反斥與對方互不相識「沒有資格評論我的人品」，同時澄清「最後我真的不是什麼大明星我只是一位演員！」，以理性角度回應對方指責。

其後，唔少網民見狀亦力撐袁偉豪回應，指藝人都要有私人空間、叫該指責者「看事情要看全面」、「說話前望三思」，又認為袁偉豪今次回應該名網民亦只係想直接表達個人感受，以事論事。

之後，該名指責袁偉豪嘅網民亦再次留言，感謝對方「哀（袁）生的回應」，指：「我原本也喜歡你的演戲…只不過上次給我見到你和粉絲合照一面，原來真人是這樣，現在一切明白了」，唔知大家覺得呢位網友最後明白咗啲咩呢？

接連負評如潮開live剖白

過咗幾日，袁偉豪就特登開live同觀眾及粉絲們傾下《鐵探》劇情，不過唔少人都比較關注近期發生嘅合照變面事件，而袁偉豪直播中剖白表示：「會唔會有時覺得我份人太過率直呢？太過火爆呢？同網民太過深入、太過認真，令到有太多負評？」

另外，對於大眾對佢嘅負評，袁偉豪坦言自己都會有唔開心，但自己有時亦會忍唔住隱藏呢類留言，同時亦會因而加強鞭策自己，努力於工作上再做得好啲，不過就已考慮減少回覆留言，以免添是非。

否認形象變差關女友事

至於網友對其女友張寶兒（Bowie）嘅批評，袁偉豪則指知道有好多人唔明白點解佢同Bowie一齊後，隨即發生唔少唔好嘅新聞，甚至知道唔少人都覺得係女友背後搞事搞非。對此，袁偉豪反而以更肯定嘅態度指自己與Bowie一齊後只係變得更加率直及更加直接，但亦因而失去部分工作機會！

對於失去工作機會，袁偉豪就話：「可能有時候會令一些客戶覺得袁偉豪這個人太過直接，或者係咪唔想搵我去做嘢呢」，然而佢強調會調教自己嘅睇法及態度，唯獨從未改變過嘅係自己對工作嘅要求及熱誠！

同大家認錯

另外，袁偉豪曾因護女友遭司機舉中指，更嬲爆甫對方車牌公審該司機，佢就話自己只係個普通人，當下唔知點樣宣洩自己情緒，所以先選擇喺個人社交平台分享感受，但對於事件造成公眾迴響，則表示：「唔好意思，對唔住。」，同大家認錯。

之後，袁偉豪再指有時網友留言會令佢感到受傷害，例如「有袁偉豪嘅戲我唔會睇」、「唔知點解咁嘅戲（《鐵探》）都可以上到Netflix」等，但網友唔需要為呢啲說話負責任，自己都唔會怪佢哋，並補充今次唔係以一個藝人或演員嘅身分去講，「純粹以我袁偉豪嘅身分同大家share自己感覺」，並再次強調唔好咁多負能量！

即時回顧：

之前，TVB藝人余德丞(Dickson)踢波期間暈倒，更一度送至深切治療部留醫。當時，Bowie卻不慎上載一張余德丞與同劇演員食飯的黑白照，雖然Bowie急剷相片換上彩色照，但已經被大批網民鬧爆，身為男友的袁偉豪兩度留言解圍！

張寶兒，在ig貼一張新劇《鐵探》合照，並寫道：「鐵探精神。#鐵探#一個都不能少#細超#心不放棄身體就會跟隨#一定要快點康復#還有阿招#祝福#打氣#pleasegetwellsoon#nevergiveup」相中還有謝東閔、梁烈唯、余德丞、袁偉豪，張寶兒，和未有出鏡的蔡思貝。本來加油、集氣係出於好意，但張寶兒卻將相片轉為黑白照………

重新Po彩色照

未幾，張寶兒立即將黑白照「下架」，再重新上載一張一模一樣、但變彩色相。

網民鬧爆

有網民見到黑白相當堂嚇一跳，而張寶兒急急回應網民解釋：「我見到都嚇一嚇！一個月前我係draft設定咗圖片filter，今日鋪前改了顏色，但鋪後卻發現佢仲儲存咗一部分之前設定。所以唯有九秒九下架重新設定。希望大家不要有誤會！」不過網民話既然本身係彩色照，點解要多此一舉轉黑白照，插佢狡辯，有網友更舊事重提，話早前袁偉豪爸爸過身，張寶兒又疑似趁機賣郵輪廣告！

寶兒向大家講對不起之外，再作解釋，指設定有問題Po了3次，等到第4次才成功！

袁偉豪護花

網民鬧到張寶兒狗血淋頭，男友袁偉豪21分鐘後留言護花，留言叫大家一齊支持余德丞，遠離負能量……

可惜網民群情洶湧，不斷數落女友，袁偉豪今早再度留言，希望為女友解圍，但似乎無助平息事件，有網友連袁偉豪都鬧埋！

張寶兒就回應男友：「謝謝你。不過不用為我擋。我要解釋的已經解釋過，各人喜歡如何理解可能關乎各人的價值觀。如果是心水清的，或者願意認識我的，就會願意知道我是什麼人——可能還是有點大意（對不起，我也在一天天學習成長），但絕對對自己的心性和思考有要求。我相信愛是最大的力量，所以會盡我的努力愛身邊所有人。對不起，在你專注開工的時候為你帶來麻煩。請不用把精力放在這裡，我們好好祝福德丞要平安，繼續為他凝聚正能量就好了。」

屢次出事

張寶兒唔係第一次玩ig「出事」被網民喪插，對上一次係今年5月底，當時袁偉豪的爸爸不幸離世，傷心欲絕的袁偉豪在社交網寫下沉痛感言，「樹欲靜而風不止 子欲養而親不在 爸爸永遠懷念您」袁偉豪的爸爸與癌病搏鬥多年，早前不幸離世，傷心欲絕的袁偉豪在社交網站公布父親離世的消息，寫下感言及上載多張與父親的合照、以及父親年輕時的照片。袁偉豪又叫爸爸好好休息：「放心，媽媽交給我吧。」

袁偉豪：你是我心目中最堅強的爸爸

人稱泰哥的袁偉豪爸爸，從前是一名警察，從袁偉豪上載的照片可見袁爸爸年輕時一臉英氣，當中有其穿上警察制服的舊照，亦有一家人的家庭照。袁偉豪稱爸爸是一位為市民服務的好警察，又寫道：「你是我心目中最堅強的爸爸，辛苦你了。不再痛苦，好好休息。」

張寶兒稱袁父「爸爸」

至於袁偉豪女朋友張寶兒，早前拍攝新一季《學事學非》時雖然保持歡笑，但當接受訪問時提到袁爸爸去世，亦不禁傷心落淚。張寶兒受訪期間亦以「爸爸」稱呼去世的uncle，可見佢同男朋友家人感情相當要好。所以袁偉豪女友張寶兒亦有感而發，早前喺社交網站寫下大段感言，但就被網民指佢其實係乘機賣廣告！

張寶兒有感而發

向來給人感覺係個開心果的張寶兒，人前經常嘻哈大笑，在網上亦不時發放正能量，早前佢上載一張自己喺遊輪上的照片，寫下大段感言，類似係自己對「生命」的一番感受，似乎都係因袁偉豪爸爸離世所以有感而發，亦希望安慰男友。

被質疑賣廣告？

不過有眼利網民發現，在文字下的一大hashtag中，出現了「#世界夢號」、 「#dreamcruise」及「#海洋的氣息」等字眼，似乎就係講緊Bowie身處的星夢郵輪「世界夢號」，難免有人覺得佢係賣緊廣告…

張寶兒：下次會小心啲…

張寶兒之後出席無綫節目《海上夏日郵樂園》活動，提到被質疑借男友父親離世賣廣告，寶兒就話該文章係男友爸爸離世前後幾日寫，純粹因為嗰幾日發生的事有感而發。又表示作為藝人，講任何嘢都可能令人覺得係賣廣告，下次會小心啲。

袁偉豪Man爆護花

對此袁偉豪在IG上載一張張寶兒笑得非常燦爛、以摩天輪作背景的照片，並留言為女友護航：「不用上心，懂你的人便會懂」下面仲有「遠離負能量吧」、「好好建立自己的生活」等hastag，網民見到都大讚袁偉豪護花man爆，果然係直腸直肚嘅暖男！

延伸閱讀：

【鐵探】石修患怪病3年體重暴跌45磅 感激秋官出手救一命