在無綫劇《棟仁的時光》中，袁偉豪(Ben)飾演要靠接吻來偷取時間延續生命的棟仁，劇中多次生命倒數剩下30分鐘，而現實中患癌的父親同樣面對生命倒數，令他非常感觸。袁父與癌病搏鬥多年，近年擴散至肝癌，現已無藥可施，袁偉豪只能盡孝子本份，全心全力照顧家人，珍惜與父親相處的最後時光。

袁偉豪憑型佬形象成功彈起，拍劇外已頻頻走埠接job，近年要孭起父親的龐大醫藥費，再加上長期處於憂心狀態，壓力已爆煲。他承認最近經常鬱鬱不歡，而且甩髮情況持續，對任何事都提不起勁。日前袁偉豪帶住女友張寶兒陪父母到黃埔飲茶，離開時見他推住身體消瘦要坐輪椅的父親，眉頭緊皺的他疲態盡現，幸有正能量女友張寶兒在背後支持，袁偉豪與爸爸都要加油。

撰文：東方新地｜圖片：新傳媒圖片庫、袁偉豪IG

袁偉豪 對人歡笑背人愁

袁偉豪深深體會到人生如戲，在新劇《棟仁的時光》中，他多次面對生命倒數，令他無時無刻都想著患癌多年的父親，更加珍惜與他一起的日子。袁父於7年前確診鼻咽癌，近年擴散至肝癌，進行化療食過標靶藥，身體卻愈來愈虛弱，袁偉豪早前出席新劇宣傳活動時表示，雖然已做好心理準備去面對，但每當想到父親都非常難受。

過去兩年，袁偉豪為上位搏命工作，曾失去至親而未能見最後一面，知情者透露：「唔好睇Ben成個大男人咁，其實佢好感性，去年因為做嘢，唔能夠見最錫佢嘅嫲嫲最後一面，佢自責到依家，跟住佢啲貓貓狗狗相繼離開，面對生離死別都好痛苦。近年佢爸爸身體每況愈下，Ben唔想失去先至後悔，所以無論工作幾忙幾辛苦都好，一有時間都返屋企見老人家，陪佢食吓飯傾吓偈都好。」藝人都係人，平時演戲已經要遏抑心情投入角色，但私底下總想做回自己，不難發現最近出席公開活動，袁偉豪笑對鏡頭後，都不自覺地流露出鬱鬱不歡的樣子。

傷在父身痛在兒心

其實袁偉豪自小與父親關係疏離，父子相處時間甚少，反而與母親感情要好。投身社會後袁偉豪只在大時大節返家食飯，不過自袁父患癌後，袁偉豪擔起長子之責，分擔父親醫癌的費用及生活費，「大家都知醫癌真係要使好多錢，做手術化療同食標靶藥都使一大筆，條路真係好漫長。屋企得Ben一粒仔，妹妹都嫁咗人，Ben好願意去負起所有責任，以佢依家嘅人氣同身價，搵錢雖然唔難，不過都好大壓力。好彩佢份人夠積極，圈內人緣亦唔差，好多朋友知道佢咁嘅環境都主動搵佢做嘢，近月佢都好頻撲，成日周圍飛接job，啱啱返到香港又要開網劇，仲要抽時間陪爸爸，鐵人都會攰啦！佢壓力大到近來狂甩頭髮，成日戴帽遮住，仲有時畀人話黑面，朋友知道佢屋企有事自然會識得體諒，唔知就會話佢擺款、難相處。」

為照顧病父及馬不停蹄工作搵錢，袁偉豪情緒面臨崩潰，幸有拍拖一年的張寶兒在身後默默支持，他才得以舒緩，最難得是女友善解人意，支持袁偉豪照顧家人為先，甚至願意犧牲二人世界，拍住拖陪袁父。上周二(1日)早上11時許，袁偉豪偕張寶兒現身黃埔一間平民酒樓，在VIP房內與父母及親友飲茶，兩小時後他推住坐輪椅的父親離開。現場所見，袁父身形十分消瘦，因體弱關係非常怕凍，要穿羽絨及戴冷手襪來保暖，行動亦很緩慢，上車時由袁偉豪扶實。袁偉豪小心翼翼照顧父親的同時，女友張寶兒亦好識做，即時協助袁母收起輪椅，如此得體，難怪袁偉豪對她讚口不絕，她亦深得袁家上下歡心。

雖然袁父的生命已進入倒數階段，但袁偉豪與張寶兒均表示不會考慮閃婚沖喜，日前張寶兒坦言現時大家都很忙，結婚是認真的事，不想逼大家做衝動的決定：「近排真係好多事發生，Ben要準備新劇，但一有時間就會陪爸爸，我都會陪佢，始終老人家會想同仔女相處多啲。」

留給父親的說話

近日袁偉豪已返回劇組開拍無綫網劇《鐵警》，他在電話中透露此劇令他心情更加沉重，「今次個角色我係做一個有創傷後遺症嘅警察，最尾仲要患Cancer，咁啱我爸爸以前係警察，真係好巧合。開工時心情真係好沉重，不過我知道我要做好個角色，要沉著應戰。」對於病情反覆現況並不樂觀的父親，袁偉豪有說話未曾講：「我知道我同爸爸嘅緣份比較薄弱，自小佢就掛住喺出面做嘢，我哋好少溝通，我想話畀佢聽，今日嘅我會好努力咁做好自己，叫佢唔使擔心，希望佢會放心。」袁偉豪坦言要珍惜眼前人，除了患癌父外，還有肯共患難的女友張寶兒。

15位大台富貴兵團 個個有樣更有米！

傳魏焌皓疑鹹豬嘴麥明詩被TVB解約 │重溫娛圈八大鹹豬手事件！

曾華倩囝囝代表港隊出賽 19歲Martin仲高過袁文傑

10位女星大解放 齊晒水著照

袁偉豪那些年參加過《YES!》校草選舉 原來黃宗澤都選過⋯