被指讀男女校係想識男仔 麥明詩FB回應獲網民大讚高IQ高EQ

前「十優港姐」麥明詩（Louisa）喺前年淡出娛樂圈投身法律界，不過佢依然會透過社交網站同網民互動。喺今日有傳媒嘅博客文章以「識男仔要學麥明詩」為題，陳思銘喺文中指自己有幸與麥明詩媽媽同台分享教育經驗。期間仲話麥媽媽指囡囡細個表現叛逆個性同鍾意扮靚，去英國讀寄宿學校時，都要揀讀男女校，原因係想「識男仔」。去到中午，麥明詩喺社交網文回應呢篇文章，獲網民大讚佢有禮貌、高IQ及高EQ。

麥明詩喺Facebook出PO回應留言話：「我呀媽退咗休，早幾日去一啲機構分享下送個女出國讀書嘅經驗（盛讚麥媽媽自力更生，賺錢養家），同「升學KOL」陳生同場，佢之後寫咗篇文透過媒體發表，首先多謝佢文章嘅kind words，但係佢唔小心引用咗好多我媽媽冇講過嘅說話，可能佢當時聽得唔清楚啦 陳生，我記得你有我直接聯絡。俾個建議，下次隨時send個whatsapp俾我，等我/我媽媽幫一幫眼先publish出黎，一方面禮貌啲啦，另一方面可以避免寫錯嘢嘅風險 順便講埋，自小喜歡扮靚，會考嘅時候就唔會咁款啦🤣。會考後係就係故意揀番男女校，話曬由小一開始已經讀咗11年女校，再讀女校有可能心理會唔太平衡，轉下環境可以學習同唔同人相處姐。不過的確，我阿媽真係好放手俾我去experience同埋試我想試嘅嘢，佢再從後支援，呢樣嘢我自己覺得好正👍 麥明詩媽媽 - 麥何小娟。Lunch hour 都過咗lu，冇乜嘢我番出去做嘢先」

唔少網民都留言大讚佢高IQ及高EQ，例如「高IQ高EQ港姐非你莫屬。有啲人真係唔丙唔得。」、「高EQ, 高手 希望陳先都學到嘢」、「禮貌地指出別人嘅唔禮貌」、「IQ EQ 都滿分 靚女又有風度 讚」、「果然係我偶像！有禮貌，冷靜，不失分寸！」及「見識到有禮貌而不失霸氣的回應，又學到野」等等。

去到4點幾，麥明詩再出PO指與陳思銘經過溝通後，為咗互相尊重同埋免再為公眾添麻煩，所以佢哋同意將文章移除，留言話：「萬事以和為貴，經過溝通之後，了解到陳先生的好意，雙方各有誤會，為互相尊重及以免再為公眾添麻煩，大家同意一起移除文章，謝謝大家」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！