雅虎香港新聞 西營盤新開台式Cafe 推介即煎鐵板吐司/芋圓仙草/黑糖奶蓋茶
疫情下有假放都飛唔到去台灣，好在香港有唔少台式餐廳，例如西營盤呢間新店就主打台式飲品同輕食，有唔少人去台灣必食嘅蛋餅，早餐店常見嘅鐵板吐司，同芋圓等甜品。裝修風格清新自然，畀大家一個可以好好放鬆嘅空間。
eden位於西營盤港鐵站附近，由三位年輕人主理，主打台式輕食，亦有All Day Breakfast、意粉等主菜。店名係引用《聖經》當中伊甸園嘅含義，希望可以打造一個靜謐舒適嘅環境。飲品就同賞茶合作，由佢哋提供唔同種類嘅台式飲品。
台式鐵板滿漢綜合吐司（早餐$51、午餐$56）
參考台灣早餐店，小店將當地嘅即叫即煎鐵板吐司帶過嚟西環，不過就改用鬆軟又有牛油香嘅丹麥吐司！滿漢綜合口味即係雞蛋、芝士、煙肉同火腿，炒蛋嫩滑，同有肉香嘅煙肉火腿都好夾。亮點之一係佢哋嘅沙律醬加咗蜜糖，甜甜哋配埋沙律菜可以解膩。
寶島蛋餅（早餐$48、午餐$63）
蛋餅亦有芝士、燻雞、肉鬆等多款口味，仲可以揀雙拼（+$8）呀，開飯仔就試咗鮪魚口味。值得一提係店主們特別選用一款特別嘅台灣蛋餅皮，食落口感酥脆又不失柔軟，有啲似薄身版嘅蔥油餅！
流心蛋煙三文魚意大利麵（午餐$91）
怕各位打工仔女食輕食唔夠飽，亦有供應意粉方便大家嚟食Lunch。煙三文魚有啖啖煙燻香氣之餘唔會死鹹，仲食到魚肉油脂香，撈埋醬汁同流心蛋嘅半熟蛋黃加倍香口。意粉亦煮得啱啱好，彈牙有咬口。
紅豆仙草芋圓（$33）
提及台式甜品，點少得近年大熱嘅芋圓！呢度一碗就有齊香甜紅豆、煙韌芋圓同滑溜嘅仙草凍。最出色係仙草凍，軟滑微甜感覺清爽。三色圓口感Q彈，地瓜圓同紫薯圓比較食得出食材原味，芋圓嘅芋頭香味偏淡。勝在加埋紅豆一齊食啱啱好，甜而不膩。
桂花水信玄餅（價錢待定）
晶瑩剔透嘅水信玄餅係打卡之選，小店版本就加入帶清新甜香嘅桂花乾，所以食落會有天然花香，口感軟滑彈牙。配搭自家調配嘅檸檬蜜糖醬，酸甜清爽，做飯後甜品就最啱。
黑糖奶蓋烏龍（$30）
賞茶供應嘅台式飲品有好多唔同種類，特別推介呢款坊間少見嘅黑糖奶蓋，用台灣黑糖製作，口感豐盈Creamy，而且喺黑糖奶蓋面會再灑上一層黑糖，雙重甜香。所以建議配搭清爽有回甘嘅烏龍茶底，降低甜度之餘亦增加層次。
eden
地址：西環高街95A號地舖
