謝文欣轉行做空姐 曾透露收入唔多須兼職做化妝師

現年31歲嘅謝芯兒Ally（原名：謝文欣）周日（9日）於IG分享國泰航空公司職員證，表示終於完成六個星期Training：「經歷咗六個禮拜好packed嘅induction I made it!!!!!!!!!! Have been through really a lot 無間斷嘅 mockup assessments問書，好努力吞晒成本600幾頁嘅manual 一嚐safety final exam滿分嘅滋味，仲有service final assessment都滿意地完成 努力嘅成果」。Ally又喺噚日（10日）PO出身穿空姐制服、拖住行李箱嘅照片，以記錄成為空姐後嘅第一班機：「First Flight，開開心心完成，好好紀念一下，Nice flight, Nice crew, Nice weather, Thanks for the flight」，朱智賢、周奕瑋、羅孝勇、劉思希等藝人均留言祝福。

Ally2011年參加「大專校花校草大選」畀何哲圖睇中簽約成旗下歌手，曾因外貌似同門師姐鍾嘉欣而被安排擔任對方個唱嘉賓。不過之後都無咩唱歌相關工作，反而被安排主持音樂節目《勁歌金曲》、《無間音樂》，直至2018年先正式以歌手身分出道，推出第一首派台作品《其實我牽掛》，並於《2018年度勁歌金曲頒獎典禮》奪勇「最受歡迎新人獎」，唔知係咪等足5年先一圓歌手夢，Ally喺台講得獎感言時不斷啜泣，講嘢講到鬼食泥咁款，就連主持人都表示聽唔到佢講乜而成為網民熱話。Ally當時亦曾透露因為收入唔多，所以有兼職做化妝師，又有教化妝；而佢喺IG個人簡介亦有列出自己擁有歌手、空中服務員、化妝師、田徑運動員多重身份。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！