譚小環夫婦茶餐廳欠租被貼封鋪告示 旗下3家食肆一年蝕1400萬

1994年港姐譚小環同老公蔡強榮（渣哥）經營嘅食肆品牌「渣哥」，旗下喺九龍灣嘅茶餐廳被指欠租，仲被貼上封鋪告示。有傳媒向渣哥求證，渣哥亦承認確有其事，並喺社交媒體發文提及食肆經營情況。

蔡強榮提到生意情況時指「其實生意差咗都年幾兩年，尤其係通關之後，不過唔想影響到班員工同埋供應商，所以一路都默默撐得幾耐得幾耐」，但佢表示並無拖員工同埋供應商嘅數，「1蚊都冇欠過佢哋」。欠租之下，渣哥向查詢記者表示一旦要結業，「快極都仲有三幾個月之後嘅事，若然交得返哂啲租就冇事添，業主亦冇權封舖。又若然到時真係撐唔住，天下無不散之筵席，大渣哥茶記唯有提早結業，完成歷史任務」。而現時身處加拿大嘅渣哥今日再次發文，表示茶餐廳生意急升200％，仲話行街遇到唔少香港人同佢講加油，令渣哥相當感動。

譚小環同渣哥2014年喺銅鑼灣開設小食店，小環親自落場成為一時話題，生意有利可圖後，小環同渣哥後來開埋茶餐廳，並獲創立《100毛》嘅毛記葵涌注資入股。不過後來遇上疫情及消費市道疲弱等原因，根據毛記葵涌財務報表，截至2023年3月底，渣哥品牌旗下嘅小食店，以及2間位於九龍灣同灣仔嘅茶餐廳，該年度合共蝕1400萬元，比起前一年虧損380萬元，情況令人擔憂。

而喺2022年，渣哥曾經發文指本來有意向毛記葵涌回購股份，但聲稱對對方嘅出價感到震驚。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！