《警訊》播映至8月中 主題曲深入民心 一文睇清呢班藝人主持演員

《警訊》喺1973年啟播，由香港電台及警方聯合製作，唔經唔覺已經有47年歷史，不過噚日有指經雙方商討後，節目將於下月12日後停止製作，其後警方亦證實消息。其實過往《警訊》都有唔少經典，而家就同大家回顧一下！

《警訊》主題曲深入民心

由開播至到90年代初，《警訊》係以純音樂《Cross Town Movers》作為主題曲，不過就被人一種欠缺人情味嘅感覺。之後節目就換上由成龍主唱嘅電影《警察故事》主題曲《英雄故事》。去到2004年，《警訊》就搵嚟張學友作詞及主唱《勇敢的故事》，歌曲仲成為節目第一亦係唯一屬於節目嘅主題曲。再去到2009年，《警訊》就搵嚟李克勤翻唱《英雄故事》，呢首主題曲仲一直用到而家。

藝人主持

《警訊》一直由警方同藝人或港台人員一起主持節目，當中有唔少令人印象深刻嘅主持，除咗最新嘅KellyJackie之外，仲有任期最長主持嘅麥振江、當時係警員嘅林嘉華、嘉賓主持陳柏宇、雷深如（J.Arie）、鄭子誠、陳鍵鋒、劉綽琪、曾華倩、周海媚、潘志文及蔡子健等等。

警訊演員被網民熱捧

《警訊》經常以短劇方式將案件重演，唔少節目演員被網民熱捧。「御用騙徒」吳良榮喺模擬片段中經常飾演偷呃拐騙，甚至非禮同強姦嘅壞人，仲有網民封佢做「鄭子誠接班人」；樣靚身材好好嘅「警訊之花」馬溱禧，佢喺《警訊》經常飾演騙徒、港女及MK妹等負面角色，不過最深刻嘅一定係15年嘅「電話騙案」，馬溱禧喺呢集以女騙徒身份用色相呃走宅男部手提電話。除咗佢哋之外，《警訊》仲有好多令人留下深刻印象嘅演員，包括賴機說、李子明、王文韜、蔡裕彤及陳勁言等等。