資產配置大失敗 機師台灣置業投資反欠過百萬！

「開關封關」成為全城熱話，但就在歐美、東南亞大多恢復通關之際，香港和鄰近不少地區仍設下重重「疫」關。關不通、人不通，大多數人可能只會聯想到家庭團聚問題，但身為機師的黃先生，卻因為封關惹上財困。

港人喜愛置業，無論港樓還是外地樓，只要有市就有利可圖。當中，距離香港飛行時間不到兩小時的台灣，整體樓價近年也現升幅。在台置業除了能從中獲利，其地理位置也有優勢，港人可將物業當成度假屋，長遠更可變成「兩頭住家」，為移居鋪路。

不過，機師黃先生的故事就正是活生生的反面教材。一心打算賺香港人工，在台灣買樓輕鬆過活，豈料最後卻因疫情封關未能入境處理按揭，要在香港問銀行借百多萬私人貸款來支付樓價。

「手頭就得返百零萬cash，唔借就要撻訂連層樓都冇埋……我話晒都係專業人士，點會估到自己無啦啦爭成百萬街數！」

月供7,500港元！買樓易過借火？

黃先生嚮往外地退休生活，三年前見台灣樓價開始颷升，便決定將資產配置到台灣。他在桃園機場附近購入樓花，打算日後可乘兩邊飛之便，逐步把生活重心移到台灣，心底當然希望人財兩兼得。

「我成日飛嚟飛去，喺台灣飛返香港返工都係個幾鐘，其實同我喺元朗去赤鱲角機場返工差唔多。」

「而且台灣物價平啲，比起香港買樓亦都平好多，大概350萬港紙就買到1,000呎嘅新樓。如果係喺香港，劏房咁細都買唔到啦！加上我個人非常睇好台灣樓嘅升值潛力，當時桃園樓價已經連續升咗五年！所以好快就決定喺台灣置業，一方面當投資，另一方面以後可以多啲時間喺台灣生活，老咗甚至可以去台灣退休。特別係而家移民台灣，百幾萬就有交易，有份工、又有層樓揸手，容乜易！」

疫境絕望！曾打算游繩落樓辦按揭

由於海外人士在台灣買樓，按揭可做到五成，有些新樓盤更容許以香港收入作入息證明，更有機會將按揭成數提高到七至八成，所以黃先生原本打算以自己香港機師不錯的薪水，在台灣申請七成按揭，之後每月只需月供約7,500港元，就可輕鬆將主要資產配置到台灣，享受寶島生活。但一場疫情，打亂了他的全盤計劃。

由疫情爆發起至2022年8月，台灣一直採取封關政策，未有開放予一般港澳旅客入境，黃先生在疫情前以現金支付了樓花的首期訂金約港幣15萬元後，三年來便一直未能再入境台灣，「台灣嘅新樓，都係按完工進度嚟分階段收訂金，起到20%收一次錢，起到50%又收一次錢，每次大概港幣幾萬，前前後後畀咗港幣40萬，都係電匯啲錢過去就搞得掂。」

唯疫情一拖再拖，眼見所購單位已落成可收樓，台灣發展商開始追收餘下款項，黃先生只能在香港空著急，「正常飛去台灣一轉，搵間銀行做按揭就冇問題，點估到會一路入唔到境，就算做嘢飛台灣，一係即日來回，一係瞓一晚隔離酒店就要走，收樓驗樓、做按揭，全部都做唔到！真係有諗過偷偷哋游繩落樓搞返掂件事！」

收入驟減 壓力遞增

「台灣好多嘢好似銀行開戶都要親身去當地搞，按揭要同當地銀行傾。」由於一直未能到台灣找當地銀行處理按揭，發展商又一直在追他處理剩餘約港幣300萬的樓價，黃先生最後只好在香港銀行私人貸款來先行支付樓價，硬食較高的利息，「手頭得百幾萬流動現金，疫情之後人工又減咗一大截，加上一直搵唔到台灣銀行幫我遙距做按揭，差啲就撻訂！最後唯有問銀行借多百零萬私人貸款，full pay住層樓先，捱到通關之後再過去做樓按。」

所謂人算不如天算，就是這樣，黃先生就欠下了一身債，截至今天仍在等待「通關」。

由原本打算將資產完美配置到台灣，慢慢轉到台灣生活，到最後卻變成欠銀行過百萬，黃先生坦言大失預算，「本身以為自己plan得好好，經濟能力又唔差，諗住長線一定會有回報，點估到最後會搞到爭銀行咁大嚿錢！如果係咁，我早知將啲錢放喺度買份人壽好過，起碼過幾年攞得返出嚟再投資！」

最讓黃先生感到氣忿的，就是自己一早計劃好，資金卻被鎖死，身邊不少本身沒有移民計劃的朋友卻可以突然說走就走，「最慘係而家見好多朋友突然就話去英國、加拿大，自己就想轉去其他地方都唔得，淨係可以每日等通關，同埋每個月還錢畀銀行！」

（特約分享）