走到韓國出道的4個港台明星

仲記唔記得當年以黑Girl（前稱 黑澀會美眉）組合成員身份出道嘅鬼鬼（吳映潔）？今年佢就去咗韓國出道，近日仲正式上韓國音樂節目表演佢首韓文新歌《SUGAR RUSH》，大獲好評呢～韓流越嚟越勁，加上韓國組合偏好有多國籍嘅成員吸引各地Fans，所以近年唔少熱門組合嘅成員都有我哋中港台嘅代表架，以下就係4個近期中港台身份嘅韓流大勢明星：

1. 台灣－鬼鬼（吳映潔）

其實鬼鬼都可以話喺80、90後嘅青春回憶，點解？因為當年多套台灣青春偶像劇包括《黑糖瑪奇朵》、《黑糖群俠傳》、《霹靂MIT》，鬼鬼都有份參演。加上又係當年黑澀會美眉成員之一（後稱：黑Girl），一班青春少女當然好快就受到熱烈歡迎。不過，呢個組合紅咗一段時間就沉寂咗，鬼鬼亦都退出埋。

當大家都以為鬼鬼就此會消失喺銀幕，鬼鬼出演咗當年劉子千「神曲」《唸你》MV女主角，又再次打開知名度，並接咗國內劇《陸貞傳奇》，正式打入中國市場。而最最最最重要嘅轉淚點，就係鬼鬼參加咗韓國綜藝節目《我們結婚了（世界版）》，同韓國熱門組合2PM成員玉澤演成為假想夫婦。鬼鬼活潑可愛嘅個性深受韓國觀眾歡迎，打開韓國知名度。其後鬼鬼於今年簽咗韓國經紀公司CJ E&M，正式喺韓國以新藝名Gemma出道。近日仲上咗韓國音樂節目表演佢嘅新歌《SUGAR RUSH》，表演一啲都唔會比韓國女子組合差，希望嚟緊鬼鬼會有更多精采嘅表演帶畀觀眾啦～

2. 台灣－周子瑜

入選全球百大最美臉孔嘅周子瑜，應該大家都好熟悉啦？子瑜BB被韓國娛樂經紀公司JYP睇中而成為旗下練習生，2015年正式以韓國女子組合TWICE成員身份出道，喺組合負責顏值擔當嘅子瑜好快就受到韓國Fans歡迎，而且更紅返去台灣等亞洲地區。雖然子喻曾經被迫為國旗事件道歉，而激發起中台韓矛盾，但明智嘅觀眾都力撐子瑜，所以子瑜人氣反而繼續急升。

而子瑜多次參加韓國熱門綜藝節目，又做主持，更接咗唔少廣告代言，可以睇得出「小女友風」嘅子瑜係幾咁受歡迎。近日子瑜仲上載咗佢大跳洗腦神曲「PPAP」嘅影片，唔少網民都大讚子瑜可愛呢～現時只有17歲嘅子瑜，睇嚟仲有排會紅～

3. 香港－Jackson（王嘉爾）

如果要數韓流明星嘅香港代表，當然不能不提曾經係我哋香港劍擊代表隊成員嘅Jackson 王嘉爾啦～Jackson本身好犀利架，曾經代表香港參加亞洲青少年劍擊錦標賽，仲喺亞洲排名第一添。之後佢被挑選成為韓國娛樂經紀公司JYP嘅練習生，2014年正式以GOT7成員出道，主要擔當Rapper、Martial Arts Tricking（極限武術特技）、Beatboxing同綜藝，多才多藝之餘，仲係首位韓國出道嘅香港男藝人添～

而Jackson慢慢喺韓國打響知名度，GOT7亦成為韓國大勢男團。Jackson先喺2014年推出個人綜藝節目《Hit Maker》，之後又加上韓國熱門綜藝節目《roommate》第二季，同年更獲得SBS演藝大賞新人獎，2015年更成為SBS《人氣歌謠》固定主持，係呢個節目第一位非韓籍主持，真係「香港之光」呀。而今年GOT7更舉辦咗佢哋第一個世界巡迴演唱會，近日comeback嘅新歌《Hard Carry》MV公開四日點閱量已經接近600萬。睇嚟香港代表Jackson喺韓國都發展得唔錯，希望佢可以繼續紅落去啦～（作為香港人嘅小編都忍唔住想支持一吓辛辛苦苦遠赴異地發展嘅香港Jackson）

4. 香港－ Elkie（莊錠欣）

莊錠欣呢個名大家可能唔熟悉，但只要睇到佢個樣，就會知道佢就係我哋由細睇到嘅童星啦。Elkie除咗曾經係少女組合Honey Bees 成員，亦都出演過唔少tvb劇集好似《On Call 36小時 II》做吳啟華個女同《老表，你好Hea！》做少年萬綺雯咁。鍾意唱歌跳舞嘅Elkie，透過參加韓國經紀娛樂公司Cube Entertainment嘅試鏡，成功脫穎而出成為訓練生，仲喺今年成為韓國女團CLC組合出道，喺韓國男團BEAST同大勢女星泫雅嘅同門師妹呢～不過CLC仲係好新，未咁快累積到一定嘅Fans，但佢哋唔少嘅歌喺YouTube上面都有達100萬瀏覽量，睇嚟只要成員曝光率多啲同參加多啲綜藝節目，要成為大勢女團應該指日可待。

圖片來源：鬼鬼（吳映潔）＠Facebook、GEMMA 《SUGAR RUSH 》MV 、TWICE＠Facebook、GOT7@Facebook、CLC＠Facebook