走塑裸買 14 年 淨灘執垃圾逾 400 次 90 後「大便妹」出書談環保實踐

【Yahoo 新聞報道】近年不少港人外出時自備餐盒、餐具、水樽，裸買街頭小食及手搖飲品，大便妹（Yeungs）早在14年前就養成這些習慣，常被投以奇怪目光。她從早期在網上平台繪畫以大便為主角的環保畫作，到後來分享環保生活習慣，十多年間感染及凝聚到更多同路人，也未曾被「環保L」等惡意稱呼擊倒。今年她把這些年來的心得結集成書，記載環保路上的點滴與反思。

文字記者：李雨夢

大便妹總是說，是一個被塞爆的垃圾桶，開啟了她的環保之旅。當她還是十多歲的中學生，在小食部吃完東西打算扔垃圾，怎料眼前的垃圾桶已爆滿，「然後記得生物老師有講過燒垃圾會產生二噁英，所以我就好奇我眼前嘅垃圾係點樣處理。」那天晚上，大便妹嘗試尋找答案，發現香港絕大部份垃圾只會送去堆填區，「但（資料）又寫話十年之後堆填區就要滿，我當時有少少天真覺得，咁滿咗點算啊？係咪無得再扔垃圾？」

一夜之間，大便妹意識到與其沒完沒了製造垃圾，「應該嘗試減少啲垃圾，覺得我下次再喺小食部食嘢，就要帶自己個盒同餐具。」她同樣開始關注環保議題，「開頭係有少少走火入魔，開啟咗完全係另一個層面嘅知識方向，好似有好多嘢可以學。」

熱愛海洋 組「淨灘瘋人院」

大便妹是90後自由工作者，主要從事環保教育工作。最初她在網誌分享環保日常，後來開設Facebook專頁「大便妹，學環保。」及IG，今年則出版新書《生活給我們上過的10堂環保課——我就是要環保過生活》。她分享的內容包括日常走塑裸買的經驗，以及持續了十年的淨灘行動等。她還記得第一次與六、七個朋友到石澳後灘，「想體驗一下執垃圾，當時係夏天朝早去，執咗半個鐘已經好辛苦。」最後執了一個多小時，已有500多個膠樽蓋，還有一些水樽、飲管、打火機，「我哋製造嘅垃圾係有機會唔小心落入咗個環境度，然後就可能影響好多不同生物，最終可能影響到我哋。」

熱愛海洋的大便妹也感受到海洋生態與人類如此密切，「全球暖化對海洋嘅影響係非常大，會影響到好多甲殼類同生物嘅生長有問題，整個生態其實好受人為影響。」她至今已淨灘超過400次，每周都與朋友去淨攤，更自稱「淨灘瘋人院」的院長和院友。

大便妹認為，推廣環保不能硬銷，「好怕畀身邊嘅人有壓力。你唔可能喺佢面前講你應該要點做，而係化成一個生活嘅經驗去分享，會令人比較容易接受，你嘅行為會為其他人帶嚟一啲反思。」努力經年，漸見成果，「有人會同我講，10年前覺得你係好奇怪嘅人，10年前其實覺得你好怪，但原來你係咁前衛之類。」

她的確曾經自覺是個奇怪的人，十多年前常常走塑失敗，「依家多咗人或者店家認識多咗，店家願意配合，整個社會氛圍係友善咗。」與此同時，她看見社會上有一群人走了出來營造環保氛圍，例如環保回收平台「不是垃圾站」，「有一種從下而上嘅力量，大家將佢搞到遍地開花。」

與激動網民理性討論：可能佢會明白多啲

近年大便妹等提倡環保生活的人士常被冠以「環保L」等標籤。她稱偶爾會受到網民攻擊，「對於我嚟講都好無傷害，可能係想攻擊環保L呢個身份，但佢其實未必好攻擊到我環保嘅生活，可能會話你做乜仲食肉、仲搭飛機。我自己對環保嘅定義唔係咩都唔可以做，而係盡量做環保啲嘅選擇。」每當遇上這些激動網民，她都嘗試溫柔和理性討論，「每一次都提供咗好好嘅機會或者空間畀我哋對話，可能令我明白佢唔支持環保嘅想法係點，係可以理性討論，到後來可能佢會明白多啲。」她形容環保不是極端，而是漸進過程，「拎少個膠袋、帶個環保袋，已經係支持環保，只係佢無意會到。」

實踐環保的路上，大便妹面對過不少挫敗，「因為大環境好難改變。可能覺得一啲生態好重要，但係個工程下來，其實完全毫無能力去保護，呢啲挫折感其實非常大。」但她選擇正面看待，「點樣令大家意識到我哋仲有其他嘢可以保護？點樣汲取失去嘅教訓？」一件物品，到底是垃圾抑或資源，視乎如何看待，正如「大便妹」這個來自小學年代的花名，別人所不喜歡的大便，對她來說也可以是護花的養份。