雅虎香港新聞 【車公廟求籤】拜車公全攻略 過程步驟要做足
每年農曆新年，電視新聞一定會報道嘅其中一單料必然係年初二鄉議局主席會代香港求籤。最出名係2003年時，當時仲係由政府官員代求，當年何志平（目前喺美國坐緊監嗰位）幫香港求咗一支下籤「凡事不吉」。結果當年香港經歷沙士、50萬人遊行、經濟不景等，於是自此求籤嘅責任先轉交畀鄉議局。其實點解年初二要拜車公？車公係何許人？拜車公又有咩要注意？
車公何許人也？
宋朝時一位大將軍，平定江南之亂時立下大功初封為大元帥，及後南宋末年宋帝昺因要避蒙古人侵略而南遷至香港，車公護駕同來，駐守於今日嘅西貢。由於佢深受村民愛護，病逝後就被供奉為神明，一路至今。
點解要去車公廟求籤？
傳統習俗喺車公誕辰，每年農曆年初二時去求籤；不過一般人都通常會年初三先去，因為年初三係赤口不宜拜年，所以大家就趁得閒就去。而其實車公係一年四次誕辰，除正月初二，仲有三月廿七、六月初六、八月十六。
去車公廟一定要買風車？
正常嘅車公廟參拜程序係要先買三牲及四果，不過現代人通常喺門口買一份車公衣寶就可以簡化代替。入廟前一定要買個大風車，入完去拜完車公再拎風車於香火前轉一轉（順時針），消除去年唔好嘅事，上完香化完寶就可以求籤。
鄉議局求籤收起下籤？
有都市傳說話每年鄉議局代表香港求籤，廟方會先收起下籤；不過觀乎多年紀錄，對上一次下籤時已經係2013年，之後數落就係中、中、上、上、中；所以究竟係咪自2013年之後就收埋晒下籤呢就無人得知喇。
相關文章：
