車婉婉回應被向展鵬直指好扮嘢「有咩做得唔好真係好sorry」

《中年好聲音2》仍未完結，但就爆出學員同主持車婉婉疑似不和！《中年好聲音2》100強人馬之一向展鵬，日前喺個人IG post出一張經模糊化嘅女歌手照片，又發文寫道「這個九唔搭八的歌星」、「我真人和她溝通接觸過，相識了近30年，但不值一提」、「但他（她）好扮嘢，仲串我，我為（唯）有……」，文字極富火藥味。向展鵬post嘅相中人，睇落疑似係車婉婉為明年個唱所影嘅造型照相當相似。

捲入事件嘅車婉婉尋日出席《新聞女王》慶功時回應向展鵬嘅指控，婉婉話睇到一頭霧水，提到之前同對方碰面時係《中年好聲音》謝師宴。婉婉憶述，當晚向展鵬話要同佢相認，仲話大家係跟同一個唱歌老師，婉婉直言冇印象，因為佢選完新秀跟歌唱老師曾路得上堂已經係30年前嘅事。婉婉表示因為要準備個唱，當晚冇飲酒，而佢同向展鵬講到希望向可以留耐啲，因為想佢好似吳大強咁有個唱英文歌嘅參加者，但向最尾揀錯歌。車婉婉話可能當晚太嘈，令向展鵬覺得佢講嘢語氣唔好，「有咩做得唔好真係好sorry」、「可能我畀佢嘅愛同關注唔夠多」。

至於發文嘅向展鵬已經喺IG移除批評車婉婉帖文，但就保留咗相關報導截圖，而至今向展鵬暫未再作回應。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！