【返工大混亂】港鐵癱瘓 珊瑚海小輪加班拯救打工仔

19+

今朝港鐵四綫齊壞,將軍澳至觀塘一帶打工仔被困,估唔到有一個水路方法,拯救咗一眾苦主!

 

將軍澳綫同觀塘綫喺返工時間一向都逼爆,遇著壞車就更加大鑊。今朝話就話維持10-12分鐘一班車,但好多打工仔都報料,喺藍田站要花兩個幾鐘先到達調景嶺站;而藍田站去油塘站就要等個半鐘。

 

要過海嘅朋友,去到油塘等轉車又係一個無止境嘅煉獄。

於是有人喺WhatsApp傳開一個搭船過海嘅方法,就係由三家村上船,可以搭到去西灣河,然後再轉巴士或者叮叮去港島其他地方。

 

翻查資料,呢條三家村航線自1955年開始服務港人,當時由一間叫「利安小輪」嘅公司營辦,後來由「有記」接手,現時由珊瑚海船務有限公司營運,船程10分鐘,盛惠9蚊,唔使受港鐵氣可以過海,抵畀啦!

 

除咗三家村上船過海,亦可以喺觀塘上船,同樣喺西灣河落。

珊瑚海船務有限公司嘅Facebook仲話,因應港鐵癱瘓,所以佢哋特別加開船次,疏通人流。咁用心服務市民,抵讚!

 

呢間公司抵讚之餘,其實政府係咪應該諗諗,當鐵路同行車路兩面陸路交通都飽和時,水路交通係長期發展落後呢?

 

其他內容