逆天奇案2｜麥玲玲飾貴婦槍法好比神槍手 巴金真人竟然係酒店高層

TVB劇集《逆天奇案2》喺前晚（1日）首播，播咗兩集就已經打鬥及槍戰戲連場，連上一輯飾演貴婦霍太嘅麥玲玲，喺今輯都要揸槍，仲喺槍戰中殺死卡農，超準嘅槍法好比神槍手。

噚晚（2日）劇情就講到霍太公司遇上財困，所以協助殺手逃避追捕，更打算利用殺手執行暗殺任務來討好巴金（Reggie Martin飾）。之後佢仲帶殺手去巴金別墅見面，點知形勢突然改變，發生劇烈槍戰。期間神情兇狠嘅霍太，拎起手槍以超準嘅槍法殺死巴金嘅保鑣同埋近衛隊卡農，比劇中警察仲要犀利。

喺接受傳媒訪問時，麥玲玲就表示好開心，揸槍好好玩，因為佢鍾意拍戲嘅原因係可以做到現實生活中做唔到嘅嘢，而現場亦有武指教導佢點樣開槍。麥玲玲仲話唔好睇佢咁嘅身形，不過佢平時做開運動，所以都幾靈活。麥玲玲表示今次拍攝超辛苦嘅係天氣好熱，佢記得拍攝當日仲係落雨天，又濕又多泥，喺泥地基本上係行唔到，同恐怖分子傾嘢嗰間屋仲有老鼠同曱甴，不過會都好開心見到成效好。另外，麥玲玲今次再次自費特別搵人準備戲服，好似家豪哥表示其中一套要係褲，但佢得自己唔會着得好睇，所以就做裙褲。

喺《逆天奇案2》中，有唔少演員都係熟口熟面，當中包括飾演巴金嘅Reggie Martin，佢除咗係演員之外，仲係澳門威尼斯人酒店嘅高層，之前仲試過同薛凱琪傳出緋聞。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！