過檔冇面俾 環球將Gin Lee合唱歌交張學友獨唱再重金宣傳

Gin Lee（李幸倪）去年約滿環球唱片之後，早前正式宣布加盟英皇，並立即推出新歌Dum Dum造勢。

通常歌手走人之後，舊東家都會有「贈慶」動作。而環球今日就喺報紙賣全版廣告，為久未有新歌嘅張學友最新單曲宣傳。不過呢首「新歌」，原來係Gin Lee同張學友前年推出嘅合唱歌《日出時讓街燈安睡》嘅獨唱版。

《日》合唱版推出時，張學友係以featuring身份參與，而家Gin Lee一走，環球將呢首歌安排同Gin Lee轉會首作同期推出，仲要賣埋全版廣告，做法惹來網友非議。

歌手過檔後，新東家一定出力谷，以往都有唔少唱片公司趁住呢啲時間「有所動作」，例如多年前鄭秀文轉會華納之後推出新唱片嗰期，Sammi本來效力嘅華星就將舊歌以精選唱片對撼。最經典嘅莫過於陳奕迅，喺佢離巢英皇之前本來已經錄好名為I had a Great Time嘅新專輯，但英皇選擇將呢十首歌打散，放入多張Eason精選碟，變相樂迷要買齊幾隻碟先「砌」得返呢隻未出世就已經被「分屍」嘅專輯。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！