邀細佬上節目 陳凱琳預咗再受狙擊 封印DNA風波

陳凱琳未受是非影響心情。
陳凱琳未受是非影響心情。

陳凱琳的弟弟Derek早前受狙擊,林作出千萬挑機讓他驗證父子DNA,昨日陳凱琳指事件已告一段落,弟弟不會「驗明正身」,也有心理準備林作會再抽水。

陳凱琳(Grace)昨日在中環街市出席身兼監製及主持的明珠台節目《Love Matters with Grace 》之「愛.嘉年華」活動,張馳豪、何晉樂、黃祥興、胡㻗等擔任嘉賓。Grace的弟弟Derek被指與爸爸不似樣,惹來「抽水王」林作挑機出千萬求驗DNA,引發連串風波,節目其中一集,Grace請來細佬分享在網上結識異性並成功開花結果的經歷。

Grace表示每日也跟移民加拿大的弟弟通電話,故沒有特別掛念,弟弟未開始搵工,正放假休息。問到對方心情是否已平復?她說:「嗰件事發生嘅時候佢都OK,佢識諗嘅。(Derek嗰集出街,會再惹林作攻擊?)我諗呢個訪問出街都會引起佢講啲嘢,佢有自由去講同出Post,我都有呢個準備,希望佢做呢件事心態只係娛樂吓。(有冇諗過驗DNA驗明正身?)唔會,呢件事告一段落,唔會再諗,唔會再講。」她又「劇透」會分享與老公鄭嘉穎的經歷,問到為何不請對方做嘉賓?她笑說:「遲啲先,我驚一齊做節目會好多爆肚!」

張馳豪被「派帽」

另外,拍過兩次拖的張馳豪,分享被背叛的慘痛經歷:「對方做咗啲唔應該做嘅嘢,佢有第三者,係佢主動同我講,當然好Hurt,但最後都可以做番朋友。」又坦言被「派帽」留下陰影,識女仔會提高防禦心。

受盡情傷的張馳豪,唱歌會否更有Feel?
受盡情傷的張馳豪,唱歌會否更有Feel?