郭思琳再出IG Story透露真正發火原因 炮轟鍾達茵唔識做人

歌手吳浩康（Deep）與「格鬥女神」郭思琳上年3月閃婚兼雙喜臨門，結婚一年幾嘅佢哋早前驚爆婚變消息，郭思琳因影全家福問題喺中秋節當晚於IG出Story公審老公，之後佢否認婚變。最近吳浩康邀請歌手鍾達茵（Pam）擔任其網上直播音樂會嘉賓，期間吳浩康離場如廁，鍾達茵就話：「你真係要慢慢去，因為我會掛住你，擔心你...」，結果惹嚟郭思琳即爆SEED出PO炮轟女方：「作為一個人妻，有人同我老公講埋啲咁嘅嘢，仲要開完Live凌晨孤男寡女去間無人嘅餐廳敘舊，不如大家估吓我會有啲咩感受吖？」之後，鍾達茵未有理會，仲繼續喺IG分享同吳浩康喺餐廳嘅合照兼搵嚟好友雷有輝一同拍片反擊郭思琳：「唔知Pat哥老婆會唔會公審我？」。去到噚日（17日），郭思琳再喺IG出Story透露自己真正發火嘅原因。

喺噚日，郭思琳喺IG Story分享自己回覆鍾達茵朋友嘅對話內容截圖，直指「掛住你」唔係重點，令佢發火嘅原因係老公喺直播後消失，與鍾達茵深夜孤男寡女聚舊：「其實你個friend係咪有啲嘢無同你講？？首先大家唔好錯重點先，「掛住你」呢一句唔係重點，只係令人哋老婆覺得佢對人哋老公發緊姣啫～～～激嬲人哋老婆個位...係老公直播後失蹤，無通知下同個女嘉賓敘舊，而人哋老婆打俾個老公對佢哋夜麻麻敘舊表示唔鍾意，當時女嘉賓都喺隔離聽住，而人哋老公亦都表示即刻返屋企...但係到凌晨三點都未返，人哋老婆直接打視頻去搵人哋老公，發展佢哋根本唔喺公司。點解明知阿嫂唔鍾意佢哋孤男寡女敘舊，都無視人哋感受帶人哋老公去自己間餐廳繼續暢飲呢？會唔會有失尊重呢？既然講得係識個十幾年嘅「兄弟」，明知阿嫂唔鍾意係咪都會識講下次先飲叫個朋友返屋企先呀？唔識避忌都應該要識避嫌吖！你可能覺得佢講『掛住你』係為效果，覺得我敏感咗，無問題，反正我唔覺得其他人妻會適應到有人同自己老公講『掛住你』。事實就係有啲內情我根本就冇講到出嚟，而你依家知道，你仲覺得你朋友嘅行為係啱嘅，咁你繼續啦！我祝福你哋！我唔會再作任何回應！」

去到今日，鍾達茵喺IG發長文：「上星期因為一句講完都唔記得自己講咗句說話， 和跟那位邀請我比機會唱下歌嘅好友返去自己有份營運的餐廳 「過個冷河」， 竟然被道德觀念深重嘅朋友們辱罵了， 更成為了半日鮮的娛樂新聞， 首先我衷心多謝得到呢個機會。 本以為沒太多人關心嘅事情，原來很多朋友也知道， 嬉笑當中更加得到前輩的支持，拍了一條 「搏見報」版本， 再加上有些朋友去了那間被名為「無人的餐廳」The Stadium食飯就hash tag #掛住你 給我 （ 重申本人是那間餐廳的營運者之一）， 好明顯大家都覺得這是一件 「笑料」，再者我認為這也是朋友們支持我的一種方法。 可能臨近生日，心想事成，在生日前夕在再一次成為 「半日鮮」， 而且得到嘅反應更激烈， 開始得到 「賤女人」 「臭貨」 這些美喻， 就連 2.0都inbox我恭喜我搏見報成功，還有一些長篇大論話我勾人老公嘅私信… 更加可惜的是，這些對肉體不癢不痛嘅留言， 對我嚟講係完全冇影響力包括情緒， 唯一覺得心痛的就是 「為什麼我朋友的另一半會公然地中傷佢？」有好處咩？ 我經常講笑說， 堅持做多年音樂的人，只有一單緋聞，就可以將佢嘅好音樂發揚光大，難得今次比我得到呢個機會我，我當然把握試了一次。效果的確唔錯。」

而郭思琳亦有喺今日再出IG Story就截圖嘅對話內容作出解釋：「唉…等我講得明啲！上一個STORY係我覆緊「鍾小姐啲朋友」嘅留言cap低嘅... 即係鍾小姐啲朋友好得閒..喺每個留言下面都留同一堆廢話不斷中傷人！你哋知啦～Full time mom湊仔好忙㗎... 唔得閒逐個逐個留言陪佢癲，直接出個STORY俾大家清楚我嬲嘅位喺邊好過...本身都冇諗住對外講到咁白... 諗住唔出聲等件事丟淡就算... 多謝鍾小姐嘅朋友啦～ 講白少少等大家無誤會呀！唔好以為對住人夫講句「掛住你」就可以令我嬲到咁... 我唔會㗎... 我對我老公不嬲都有信心㗎！係鍾小姐唔識做人，對我嘅無視同不尊重先令我咁嬲㗎咋！大家唔該唔好錯重點喇！唔使再出STORY又tag埋自己餐廳咁博宣傳啦... 又俾你博到見報啦！開心未？滿意未？無咩事唔該唔好再阻我湊仔！真係唔想再回應！」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！