鄭啟泰逝世︳開咪30年跨界做埋電視 為香港電影金像獎擔任報幕多年

鄭啟泰喺廣播界30年，去年底辭職離開新城，新城首席營運總監馬浚偉早前約佢返新城傾偈，氹掂鄭啟泰回巢，鄭亦一口答應，更返新城大派玫瑰俾女同事。意料唔到係回巢冇耐，鄭啟泰卻因病猝逝。

鄭啟泰中學時期到加拿大升學，大學畢業後回港到一間紙廠返工，一個禮拜後因為太悶於是打電話到商台自薦，後來獲主持人顏聯武聘任，主持深宵音樂節目，之後再直踩做埋晨早節目PA。

九十年代中期，商台有意將主打資訊嘅商業一台年輕化，當時鄭啟泰、快慢必（譚得志、陳志全）等主持受力捧，鄭啟泰同邵國華及前TVB藝人黎海珊喺下午時段主持節目，收聽人數大幅上升三分一。鄭同時得早前逝世、商台廣播劇《十八樓C座》編劇林超榮賞識，到有線度橋寫稿。

1999年新城大挖角，出一倍以上人工撬鄭啟泰過檔，鄭坦言嗰份收入多年後都搵唔返。但2008年新城裁員，鄭啟泰被迫轉做兼職，後得「六合彩之子」蔡國威介紹加入亞視，曾經參演模仿政界人物嘅搞笑節目，但於4年後離開。

鄭啟泰自由身嘅日子曾經冇工開，於是搵辦法開展新事業，每日見朋友、考保險牌、做運動等keep住狀態。之後新城再搵鄭啟泰返去，到去年底因為想北上發展而請辭。而鄭近年亦簽約邵氏，拍過唔少TVB劇，多數演綠葉。

鄭啟泰多年來為為香港電影金像獎擔任報幕，宣讀頒獎嘉賓及得獎者名單。香港電影金像獎亦在鄭逝世後發文悼念，並表示「每年大家都能聽到這把熟悉又親切的聲音，他的專業精神，將長留我們心中」。