鄭嘉穎回應與馬國明不和傳聞被批無風度 串爆犯眾憎行為早有前料？

鄭嘉穎日前被傳與馬國明不和，佢未有直接描述二人之間嘅關係，但就多次被媒體問到會否出席馬國明與湯洛雯婚禮時，表示如果要出埠的的話未必能出席，因為要照顧小朋友。其中一次接受媒體訪問期間，被問及之後會否與馬國明食飯，鄭嘉穎就搶答表示：「得架啦，我哋有分數。」；之後有電話突然響起，鄭嘉穎尷尬表示唔好意思，當主持再問係咪馬國明致電，鄭嘉穎則拒答有關馬國明嘅問題，亦對主持講：「佢話叫你唔好再問，叫你夠啦」。及後又拍拍對方背脊直言：「多謝關心」以完結話題，此舉令網民怒批無風度：「呢個男人好小氣！ 更年期！每句說話都冇大將之風！ 呸」、「不知所謂」、「做男人，做到咁冇風度」、「鄭嘉穎真的沒有男人的風範」等等。然而，鄭嘉穎出道多年至今已曾多次被指寸嘴及無情，包括以下犯眾憎行為。

（一）踢佘詩曼落車
鄭嘉穎曾與佘詩曼拍攝《法證先鋒II》傳出緋聞，更被指因為佘詩曼，鄭嘉穎與周麗淇結束5年情。縱然二人一直無承認戀情，但佘詩曼就曾被發現於鄭嘉穎西貢南圍村屋過夜，當年為擺脫記者，鄭嘉穎狠心踢佘詩曼落車截的士離開。

（二）怒鬧記者係廢青
鄭嘉穎與陳凱琳當年拍拖不久，被記者影到二人拍拖買生果，但當時鄭嘉穎一見記者就變面，丟低陳凱琳叉腰上前喪鬧記者，仲用手機反影及不斷挑釁記者：「做咩要遮住自己塊面啊？驚畀人見到你個樣啊？你依家做啲嘢唔見得光㗎咩？」鄭嘉穎仲喺走之前大鬧記者：「廢青嚟㗎」。

（三）未有出席戴思聰葬禮
已故「樂壇教父」戴思聰曾經係鄭嘉穎老師及經理人，當年鄭嘉穎為答謝恩師，簽下終生收入被抽佣嘅賣身契，後來二人因意見分歧及抽佣問題反目。戴思聰2010年因心臟病離世，當時鄭嘉穎未有出席葬禮，更有媒體指鄭嘉穎曾於餐廳遇到戴師母，但鄭嘉穎當對方無到之餘仲轉身離開，被指無情。不過，鄭嘉穎拒絕回應，指以免愈描愈黑。

（四）踢鞋羞辱林子善
林子善曾經表示與鄭嘉穎拍攝TVB劇集《鐵馬尋橋》前已覺得佢好串，而當年拍攝期間，鄭嘉穎就曾經喺化妝間踢走林子善對鞋，隨後仲要扮無嘢咁睇劇本，林子善當時就直言鄭嘉穎「態度極差」。

（五）拍《拳王》頻爆粗
鄭嘉穎2012年拍攝TVB劇集《拳王》被傳態度囂張，不時於片場發難，更爆粗問候對手，得罪人多稱呼人少，就連為該劇擔任動作指導嘅冼灝英亦公開力斥鄭嘉穎，認為佢太自我唔識尊重人。有傳媒曾向同劇李家鼎求證，李家鼎亦直指鄭嘉穎成日發脾氣，又暗寸公司寵壞鄭嘉穎。

（六）搶王喜戲份
王喜向來係《烈火雄心》系列男主角，但卻於第12集被安排昏迷足足10集，當年有指鄭嘉穎向樂易玲主動要求加戲份。鄭嘉穎與王喜拍攝《烈火雄心3》被指不和，王喜當年就曾直認與鄭嘉穎可能有些少誤會，笑指如果拍部80集長劇，就有較多時間了解，以消除誤會。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！