鄭欣宜飛加拿大拜祭肥姐 雨中墳前落淚令人心痛

不經不覺鄭欣宜「神隱」接近一年，去年底Joyce為好友許廷鏗MV《一場同學》演出，又為動畫片《星願奇緣》擔任粵語配音，似為復出做足準備，不過近來欣宜又再消息杳然。

有傳媒今日收到讀者報料，聲稱影到欣宜喺加拿大拜祭亡母肥姐沈殿霞。從照片所見，欣宜著住闊身衫，冒雨去到溫哥華一個墓園，喺肥姐墳前整理鮮花，不時輕撫墓碑。拜祭期間，欣宜不時落淚，加上溫哥華不時有雨嘅天氣，令人更覺心痛。

肥姐2008年2月19日因癌症惡化於香港逝世，終年62歲。其後肥姐家人安排肥姐於溫哥華Burnaby一個墓園落葬。欣宜於過年及肥姐死忌前飛到加國拜祭，此行別具意義。而欣宜去年聖誕罕有出post，貼出兒時同肥姐合照，又寫道「聖誕節係一個與家人同你愛嘅人度過嘅節日。可能因為咁所以呢排成日夢見你」。

去年3月欣宜舉行完紅館演唱會後，突然絕跡幕前以至社交平台，因此被傳媒指佢掛住拍拖而「潛水」。Joyce嘅經理人林姍姍回應傳媒時話「Joyce的確係病咗，療傷之中」，但並未交代具體情況。之後有傳媒報導過，欣宜「神隱」後，曾經喺廟街同街邊唱歌檔嘅姐姐玩busking﹐又有網民喺日本東京成田機場影到Joyce同男友Derek以及髮型師好友Benjamin一齊去旅行。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！