雅虎香港新聞 給欣宜女神的一封信
欣宜：
我同好多香港人一樣，睇住你長大，首先要同你講句對唔住，我真係同好多香港人一樣，喺你細個嘅時候，覺得你走出嚟唱歌跳舞好乞人憎，會嘲笑你，甚至聽到阿媽恐嚇我唔好食咁多零食因住大個變到欣宜咁肥，會真心驚。
到你鍚咗吳唱k一啖，我仲同網民一樣瘋狂share你d cap圖s，以及強力恥笑。但係今日，我真心share你首新歌《女神》喺自己facebook，真心想支持你。
人會成長，包括你、我，同好多香港人。
我對你嘅改觀，由肥姐過身開始。面對鄧光榮大哥嘅言論，你處理得非常得體，你對住傳媒回應同秋官嘅父女關係，亦好大方。當時我諗，如果我係你我都唔知點算，但原來當日跳舞扭扭吓嘅肥妹仔，已經變得咁成熟。
由你唱畢打自己人嘅主題曲《無人完美》，我開始欣賞你嘅唱功。你唱出「無人完美 然而除非 你看到另一位自己」嘅歌詞好有道理。而《愛回家》嘅「在世間遮風擋雨有一種愛」，拍得住《真情》嘅「笑聲笑聲 滿載溫馨」咁經典。
我更加欣賞你嘅歌，唱出你自己。
當個個女仔都追求大家歸瘦嘅時候，經歷過地獄式減肥嘅你，宣佈唔再刻意減肥。《你瘦夠了嗎》唱出真我，亦唱出一個追求健康、活出真我嘅價值觀。
今次你唱《女神》，你話呢次係你第一次執導所以好緊張，而我睇完個MV之後真心覺得，一直鍾意開嘉欣bb、翠如bb嘅我由今日開始，要封你做我女神！香港樂壇好耐冇一個咁用心去拍嘅MV，成件事好真誠，你嘅歌聲配合歌詞，你嘅自身故事加上邀請拍攝嘅每一位女生，令我好感動，我好多女同事聽完都話好受到你鼓勵。
「不要講和 威嚴會碎下來
你是女神 不要被下價 的化妝掩蓋」
你帶畀我地嘅唔止娛樂，仲有好正面嘅想法。
其實唔需要大製作，唔需要ABC Tone，唔需要洗腦式熱播K歌，香港樂壇需要嘅，首先係一個好似你咁真誠、用個心去唱歌嘅香港女歌手，希望你繼續努力。
我相信肥姐在天之靈，一定會好為你驕倣，佢一定會讚你係乖女。欣宜，無論你以後係肥係瘦，我都會咁支持你！
你係真正嘅香港女歌手！
阿仁上
2016年4月28日
延伸閱讀：
