醉駕 包二奶 被下架《還珠格格》主角全數出事 除咗佢

上星期內地突然傳出憑《還珠格格》走紅多年嘅趙薇，一夜之間所有作品喺串流平台上消失，事件被指同趙薇旗下藝人張哲瀚曾經喺日本靖國神社拍照有關。雖然趙薇已經喺IG出post蒲頭，但亦有唔少人擔心佢嘅下落。

當年《還珠格格》嘅主角，居然相繼喺內地出事，搞到聲名狼藉。有網民開玩笑，話劇中容嬤嬤用針拮過嘅，都會有麻煩！不過其中一位男星，竟然冇事！

林心如

事有湊巧，同趙薇一齊拍《還珠格格》嘅林心如，上星期主動注銷內地工作室嘅登記，令外界揣測林心如係咪有意淡出內地市場。喺2018年，林心如擔任製作人嘅作品《我的男孩》申請到台灣文化部2000萬台幣補助後，被指係台獨份子，要急急出聲明，自此林心如減少內地演出工作，就連佢老公霍建華都喺去年底注銷工作室。

周杰

飾演深情爾康嘅周杰，照計人氣唔會差得去邊，但係點解冇咩作品？因為是非多！其中一單最爆就係林心如上節目投訴拍接吻戲時被對手「伸脷」，矛頭直指周杰！呢單以外，周杰又試過同保安打交、酒後駕駛出事不顧而去，仲有傳佢扮大牌、恰新人等等負面消息，印象大打折扣。今年5月有綜藝節目請到周杰參加，同場嘅舒淇都問佢唔拍戲係咪因為冇人搵！

范冰冰

曾經入選《時代雜誌》最有影響力人士、獲邀成為康城影展評審，由妹仔「金鎖」做起嘅「范爺」本來真係內地影壇第一人，準備走向國際，點知2018年嘅內地娛樂圈陰陽合約風波，燒埋范冰冰嗰疊，最後「范爺」要潛水一排，再被罰接近9億人仔，連男友李晨都分埋手！直到今年范冰冰先再有劇集出街，但係聲勢大不如前，唯有轉戰建立個人美容品牌。

張鐵林

咪以為「皇阿瑪」好正氣，張鐵林感情生活同皇帝有得揮！多年來張被傳感情生活混亂，甚至有多名私生子女。2016年就有其中一名私生女告上法庭，要求張鐵林俾撫養費，但係張就多番否認，結果法庭判張鐵林敗訴要一次過俾18年生活費用。更誇張嘅係有傳聞話張鐵林搵人綁架搶走私生子！

蘇有朋

唯一冇出事嘅就係五阿哥！蘇有朋憑《還珠格格》紅遍兩岸，打後幾年都有唔少劇擔正，近年多數參與內地綜藝節目。2015年及17年蘇有朋做埋導演執導長片《左耳》及《嫌疑人X的獻身》。聽落平淡，但對比起其他幾位，執身彩啦！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！