金像獎 2024｜ 黃子華擔心《毒舌大狀》沒獎以致表現激動 ：戲劇性太大喇，我真係有少少負荷唔到

第42屆香港電影金像獎頒獎典禮於4月14日假香港文化中心隆重舉行，19個獎項已全部頒發，《毒舌大狀》奪得最佳電影，全員齊集後台接受傳媒訪問。

黃子華說：「我覺得能夠攞到呢個獎，對我哋嚟講係最圓滿，佢代表咗我哋幕前幕後成組人，佢哋度咗幾多年，遇到幾多困難，每個部門嘅一個肯定。對我嚟講呢個都好緊要，而係咪票房好就係一部好電影呢？票房好都可以係一部好電影。我哋又知道以後嘅方向，要做一套好電影，唔一定要整死佢，票房好都可以，我覺得係一件幾開心嘅事。」

他坦言沒想過自己能奪得影帝，「講真我係預咗冇嘅，頭先我係好緊張，因為到我嗰陣已經差唔多最後，都仲係一個獎都攞唔到，我就真係好想攞喇。因為我攞嘅時候就可以將呢個獎，內心諗如果我哋冇任何獎攞，阿Jack（吳煒倫）呢個你攞返屋企，我係希望咁樣。但係對我嚟講𠵱家係一個更好嘅結果，呢個係代表住我哋全體。（因為劉青雲冇到？）唔關事㗎青雲，有青雲喺度我都冇運行㗎啦，有青雲喺度我死多兩錢重，咁多影帝。因為我覺得呢一套戲，我係睇住佢孕育嘅過程，佢哋付出嘅努力，點都畀一個獎掛，有一個掛，到我嗰陣都一個都冇啊。到最後呢個戲劇性真係玩得太大喇。我諗都好少攞最佳電影，係其他任何部門冇攞過一個獎喎。對我嚟講呢個戲劇性太大喇，我真係有少少負荷唔到，所以有少少激動。可能個人年紀大，都容易激動。」

他自覺是一位新演員：「如果我今日有攞獎，都想上台澄清一樣嘢，呢幾年，大約6年前，我係20年冇拍過戲，呢6年我只係拍咗4部戲，其實我係新演員，我隨時拍嘅戲唔夠阿Dee（何啟華）多，唔夠佢哋任何一位多，我覺得我係好新，我覺得未來係無可限量。」黃子華分享後，身旁的隊友們都紛紛為他鼓掌。