金像獎2023︳劉青雲憑《神探大戰》 三奪影帝俱感激太太 當年「太空船論」冧爆全港

劉青雲憑《神探大戰》獲得今屆香港電影金像獎最佳男主角，擊敗一同角逐嘅黃秋生、張繼聰、麥沛東及楊偉倫4位演藝學院畢業生。得獎後青雲表示「如果大家有夢想，而肯努力，而且又夠長命，你嘅夢想會有一日好奇怪地，而又帶點遺憾咁實現。但唔緊要，世事豈可盡如人意。我亦都好多謝係鏡頭面前既你，亦都好多謝所有熱氣香港電影，熱愛香港既朋友，掌聲又好，噓聲又好，我都接受，因為仲好過無聲，多謝。多謝自己團隊以及我太太，佢地成日都見到神探，即係唔係呢套戲裡面，佢地用左超乎一般人能夠忍受既能力，佢地其實可以每一日接受一次核爆。」

今次係劉青雲第三次得到影帝殊榮。2007年第26屆香港電影金像獎上，劉青雲憑《我要成名》首度封帝，台下劉青雲嘅太太郭藹明(Amy)眼泛淚光，青雲在台上表示要特別感謝2個人，其中一個就係太太。

而最經典係2015年佢再憑《竊聽風雲3》成為金像影帝時，就以別出心裁嘅「太空船論」感謝太太。劉青雲話「當我揸住隻太空船飛去宇宙唔知邊度時，你總有方法令我好安全返嚟地球」，令唔少人感動。之後有人揣測，當年修讀工程嘅郭藹明曾被美國太空總署(NASA）聘用做實習生，仲話Amy因為劉青雲而放棄事業，所以劉青雲以「太空船論」感謝佢。但係呢個講法已經被郭藹明否認，Amy話當年並無加入NASA，而且係為咗選港姐而返香港，當選後亦要履行港姐職責，公司唔會等佢咁耐。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！