金像獎2023｜《給十九歲的我》奪最佳電影惹網民不滿 蝦頭成民選最佳女配角

第41屆香港電影金像獎已於昨日（16日）晚上圓滿結束，獎項塵埃落定；最佳男主角由劉青雲奪得、鄭秀文奪最佳女主角、王菀之奪最佳女配角、許冠文奪最佳男配角、林諾奪最佳新演員獎，而最佳電影則是早前備受爭議的《給十九歲的我》。獎項結果出爐後，網民對頒獎嘉賓及部份獎項似乎有意見。

《給十九歲的我》奪最佳電影惹網民不滿
香港電影金像獎最佳電影賽前以《正義迴廊》呼聲最高，但結果由紀錄片《給十九歲的我》奪得，導演張婉婷未有現身，但就事前準備好致謝辭由聯合導演郭偉倫讀出，當中就提到自己今生無悔，感謝所有參與拍攝嘅同學們及工作人員；而郭偉倫亦表示：「香港拍紀錄片嘅導演，請你繼續努力去拍紀錄片，唔好驚，因為時代需要拍紀錄片，用鏡頭紀錄我哋發生嘅事，記住唔好熄機，繼續拍，唔好驚，拍咗先算，剪咗先算，上咗先算。」由於《給十九歲的我》上映時未獲部分主角同意公映而惹爭議及暫停公映，加埋郭偉倫呢番說話惹網民不滿及戥《正義迴廊》唔抵：「今次電影金像獎將一把無形的刀，再次插入當事人心上，不是身體受傷而是心靈受傷。」、「可能成為香港電影史上無得睇的最佳電影」、「唔俾播都拎最佳超突然」、「比套19歲明顯就係政治操作，向唔肯妥協嗰幾位女學生示威，做法下流低劣，手段極度卑鄙」、「爭拗中停止上演，到底有幾多人睇過，小圈子自家玩嘢，唔通係鬥氣」「畢竟投票係小圈子」、「估唔到正義迴廊得咁少獎」等等。

王丹妮唔識讀得獎者個名被批唔專業
王丹妮與劉俊謙頒發「最佳編劇」獎項，除咗以一段「冇對白戲」讚揚編劇重要令網民感尷尬，王丹妮於宣讀結果時更加唔識讀得獎者個名。最佳編劇由韋家輝、陳偉斌、麥天樞以《神探大戰》奪得，不過王丹妮喺讀麥天樞個名時一度停頓咗幾秒，仲細細聲問：「呢個點讀？」，之後直接略過「樞」字，僅與劉俊謙一同讀出：「《神探大戰》」，令一班網民批評王丹妮唔專業，無做好事前準備，又表示應該喺播放提名名單時留意大會讀出嘅名字，例如：「唔識讀係咩玩法」、「唔識讀人哋個名」、「王丹妮好尷」、「完全唔識尊重人」、「基本尊重呢」、「頒獎唔做功課」及「有冇尊重過人 頒獎都要知道得獎者嘅名」等等。

林諾擊敗Jer及Edan奪最佳新演員
最佳新演員今年競爭激烈，包括賽前大熱童星林諾、MIRROR成員Edan呂爵安與Jer柳應廷，最後獎項落於《白日青春》林諾手中，並由奧斯卡影后楊紫瓊頒獎。林諾為首個獲金像獎、金馬獎提名嘅南亞裔演員，早於《白日青春》首映禮時已被黃秋生大讚做戲好叻，係個天才。唔少網民都紛紛留言恭喜佢得獎，仲大讚佢人仔細細，上台講感受好淡定真係好犀利。

鄭秀文提名10次終奪最佳女主角
鄭秀文憑電影《流水落花》勇奪最佳女主角，第十次提名終奪影后。佢得獎時就提到：「其實最佳女主角呢個獎對我來講好似遙不可及，但有陣時就只係一步之遙」，亦表示沿路遇到好多困難，由不被認同，到今日大家見到佢演出上嘅蛻變。對於鄭秀文奪獎，大批網民都認為佢實至明歸及替佢感到高興，紛紛到鄭秀文社交平台留言送上祝福：「今天看到sammi姐圓夢真的好好好好開心！恭喜恭喜，我最愛的最佳女主角！我自己也是充滿了動力，也要去完成我自己的夢想！」、「恭喜你呀sammi !!!!!!! 剛才你致詞我都睇到眼濕濕，你嘅努力係完全冇白費架！ 你值得擁有！隔住個mon都睇得出你好激動，好興奮！恭喜哂呀！！」、「sammi得左！ ！ ！等到花兒也謝了！」、「實至名歸！同你一齊等，等咗咁多年，終於攞到啦！」等等。

劉青雲奪最佳男主角 網民替楊偉倫同麥沛東不值？
最佳男主角提名名單分別係《正義迴廊》麥沛東、《正義迴廊》楊偉倫、《白日青春》黃秋生、《窄路微塵》張繼聰及《神探大戰》劉青雲，最後影帝獎項落入劉青雲手中，亦係佢第三度封帝。不過，網民似乎更想由楊偉倫或麥沛東奪得獎項，表示佢兩個係心中最佳男主角，叫佢哋再接再厲，例如：「雖然麥沛東拎唔到 但佢係我心目中既男主角」、「窄哥麥東阿卵太貼地，離地評判唔會識欣賞」、「我都中意劉青雲… 但正義迴廊兩位男主角真係演得好好」及「替阿東同阿卵不值」等等。

王菀之奪最佳女配角 大熱蝦頭失獎
最佳女配角賽前大熱人選為《正義迴廊》蝦頭楊詩敏，最後獎項則由王菀之憑《飯戲攻心》爆冷奪獎。對於賽果，網民感到驚喜，直言戥蝦頭唔抵，湧到蝦頭社交平台留言表達支持，指佢係心目中最正既最佳女配角：「民選最佳女配角！」、「從『梁祝下世傳奇』識得你，真心鍾意睇你做戲，好surprise你喺《正義迴廊》度嘅表現，希望以後你做更多好戲畀撐你、support你嘅觀眾。（你已經同好多人證明咗你係一個好好嘅演員）」、「點解唔係蝦頭」、「觀眾心中實至名歸既女配！」、「我本身好鍾意Ivana, 但今屆我都覺得應該係蝦頭。」、「你係我心目中No.1」、「蝦頭唔好灰心，你係我心目中既最佳女配角」及「你已經係好多人心目中最佳女配角了，有目共睹。」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！