金像獎2024紅地氈｜鄧麗欣激罕Deep V現身豔爆全場 楊偲泳凸腩出晒事

第42屆香港電影金像獎頒獎典禮昨日（14日）晚上圓滿結束，影帝、影后，最佳電影等各項獎項結果已塵埃落定。除咗得獎名單，女星於紅地氈上嘅造型備受關注，一齊睇吓邊位女演員豔爆全場，又有邊位打扮出事！

鄧麗欣
鄧麗欣（Stephy）絕對係今屆金像獎紅地氈嘅焦點之一，著上Stella McCartney黑色Deep V泡泡袖透視裝及戴上Bulgari珠寶嘅Stephy與林明禎雙雙現身紅地氈現場，激罕露出事業線。Stephy透露自己一開頭有啲驚太少布，但由於對條裙一見鍾情，又喺造型師極力游說下，決定嘗試性感打扮；除咗黑色透視裝造型，Stephy又換上一套紫色Tube Dress頒發「最佳編劇」獎項，造型乾淨高貴。

林明禎
馬來西亞女神林明禎以白色Tube Dress出席今屆金像獎，造型傾向公主風，同時大晒玲瓏浮凸身材，不過就無去年透視露Bra晚裝咁博。林明禎與Stephy互相幫手檢查有無做足安全措施，又揚言如果下年有獎項入圍就會著Deep V。

楊偲泳
楊偲泳（Renci）憑《毒舌大狀》角逐最佳女配角獎項，佢就以一身CELINE低胸閃閃禮服亮相，爆乳造型令其搶盡風頭。楊偲泳條裙剪裁特別，胸下位置採用中空設計，但就出現凸腩情況，更令佢睇起上嚟有啲大隻。

梁雍婷
梁雍婷憑《白日之下》大熱奪得最佳女配角，選擇白色Tube Dress搭配Wet Hair作紅地氈造型，相當乾淨大體。

余香凝
憑《白日之下》勇奪最佳女主角獎項嘅余香凝今年準備咗兩套戰衣，分別著上Ralph Lauren金光閃閃露肩貼身晚裝走紅地氈及CELINE閃片晚禮服、Tiffany & Co. 珠寶上台接受獎項，兩套禮服都閃爆全場，佢又透露金色晚裝戰衣係囡囡挑選，為咗以最佳狀態示人，只食咗2粒朱古力。

衛詩雅
「貼地女神」衛詩雅白色Tube Dress採用前短後長設計，露出纖幼長腿，而且裙款設計特別，如同花仙子造型，不過出場前就發生小意外，整爛咗裙上吊住嘅細魚絲要即時補救。而且衛詩雅昨晚嘅妝容比起時明顯無咁Sharp，有種疲倦感。

劉嘉玲
劉嘉玲著上香檳色Tube Dress配白色澎澎袖外套霸氣現身，不過都唔夠佢另一套龍蝦裝戰衣搶鏡。劉嘉玲換上意大利高定品牌Schiaparelli 2024年春夏系列黑色晚裝擔任頒獎嘉賓，胸前一大隻金色龍蝦吊飾加上耳環又大又重，造型相當誇張惹熱議，令人想起《與龍共舞》嘅葉德嫻。

周家怡
同樣為頒獎嘉賓嘅周家怡著上黑色長裙高衩連身晚裝出席，每行一步都露出白滑長腿，甚為養眼。

Angelababy
Angelababy（楊穎）久未於金像獎露面，今次以Gaurav Gupta米白色晚裝裙擔任頒獎嘉賓，貼身剪裁及下身兩旁嘅大Ruffle設計造型相當華麗，散發陣陣女神氣息。

謝安琪
謝安琪（Kay）以一條黑色入膊A-Line長裙示人，平穩取勝，不過佢個頭就整到好似80年代咁款，唔係咁好睇。

廖子妤
有份提名女配角嘅廖子妤（Fish）穿上一條閃爆深藍色長裙，高貴感十足。

林熙蕾
48歲台灣性感女神林熙蕾以黑色露肩裝踏上紅地氈，仙氣十足，而且外貌體態不輸少女。

鍾雪瑩
憑《填詞L》入圍最佳女主角嘅鍾雪瑩以CHANEL套裝現身，罕有地性感。不過，其眼妝就引來網民爭議，指化出個「黑眼圈妝」，覺得好無精神。

吳冰
吳冰憑《1人婚禮》角逐最佳新演員，為配合電影，著上小眾品牌類似「婚紗」嘅全白色裙款，腰間縷空設計露出纖腰，其露背設計更騷出紋身。

陳漢娜
「文青女神」陳漢娜（Hanna）著上黑色花奔印花長裙出席，不過鬆身設計略顯顯肥，尤其係見到晒腋下部位贅肉。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！