金像獎2024︳港台DJ陳永業接替鄭啟泰任報幕 劉嘉玲岑珈其大小龍蝦飾物搶眼

為金像獎頒獎禮擔任報幕十年，即時讀出得獎者資料嘅新城DJ鄭啟泰今年2月離世，唔少觀眾都想知道由邊位接替，結果尋晚頒獎禮由港台DJ陳永業擔任報幕。加入廣播界近35年嘅陳永業，曾經推出過唱片，並加入TVB主持《今日VIP》及擔任旁白。陳永業近年重返港台，現時為第5台主持晨早節目《自在早晨》。

頒獎禮亮點之一當然係由劉嘉玲代最佳男主角梁朝偉上台領獎。劉嘉玲尋晚所配戴嘅金龍蝦吊飾相當搶鏡，原來係出自意大利品牌Schiaparelli 今年春夏裝系列。原來1991年由劉德華、張敏同葉德嫻主演嘅《與龍共舞》入面，葉德嫻喺一場去ball嘅戲份中，Deanie姐著嘅晚裝胸前都有隻龍蝦，仲話係由”Sit Down Please“設計，有網民就話劉嘉玲係向Deanie姐致敬。無獨有偶，代表《金手指》行紅地毯嘅岑珈其，胸前都戴住個小龍蝦飾物，唔通今年興？

近年主力發展內地嘅Angelababy（楊穎）擔任頒獎嘉賓，可能太耐冇喺香港出現，好多網友都話爭啲唔認得Baby。而Baby同馮德倫負責「最佳亞洲華語電影」時，居然演變成馮德倫同爾冬陞夾埋叫外賣嘅「廣告時段」，擺明幫外賣平台宣傳。

Angelababy以外，罕有現身嘅仲有「終身成就獎」得主洪金寶太太高麗虹，以及曾經拍過多套港片嘅台灣女星林熙蕾。高麗虹1984年參選港姐奪冠入行，後來加入影壇走打女路線並拜洪金寶為師，後來與當時已婚嘅洪金寶撻著，到1995年二人成婚。而林熙蕾千禧年前後來港拍過《賭俠大戰拉斯維加斯》、《烈火戰車2極速傳說》等多套港片，2011年林熙蕾嫁予商人後淡出，婚後育有2名女兒，到去年先喺劇集《繁花》及《此時此刻》復出再現幕前。

姜大衛憑《白日之下》獲得最佳男配角獎，入行70年首次獲提名就得獎，John哥揚言唔會退休，至於點慶祝就要問太太李琳琳。有觀眾及記者留意到琳琳姐出席頒獎禮時，耳仔塞住個白色裝置，John哥代為回應話係助聽器，仲講笑話「佢冇戴嘅時候，我可以鬧吓佢」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！