金宵大廈2｜丁子朗棄讀名校入行 曾與戴祖儀、林宣妤傳緋聞 直認與圈中人拍過拖

丁子朗出演《金宵大廈2》單元「吃播」外賣仔阿甘一角，故事參考韓國「N號房事件」，丁子朗表示拍攝時愈拍愈心寒，其中一場廢墟拍攝，更令佢憶起曾經喺台灣懷疑被鬼上身嘅靈異經歷。丁子朗自爆曾到台灣旅行時衰多口，一到酒店房就笑指間房有好多聖經、擺設，當晚半夜起身突然騎住朋友，仲叉住對方條頸；不過翌日丁子朗完全無印象，疑似被鬼上身，直至而家都心有餘悸。

丁子朗2016年參選香港先生選舉，勇奪亞軍、最上鏡先生及現場最受歡迎香港先生而入行，當時佢仲放棄咗加拿大名校讀書嘅機會。丁子朗入行後機會不斷，有份主持大騷之外，更於2022年播出嘅《青春不要臉》中擔任男一，而4度提名「飛躍男藝員」嘅丁子朗亦終於喺《萬千星輝頒獎典禮2021》奪得獎項。據知，丁子朗父母曾經覺得娛樂圈收入唔穩定，擔心佢食唔飽著唔暖，希望佢返加拿大讀書，最後丁子朗努力說服父母；於奪得「飛躍男藝員」時，丁子朗發表感言表示：「我盡量令到屋企人唔好擔心，希望你哋會見到我嘅成績，我會繼續努力。」

愛情方面，丁子朗曾與林宣妤及戴祖儀傳緋聞，不過自從林宣妤被傳係李澤楷新寵後，林宣妤亦澄清與丁子朗無拍過拖；至於被影到與戴祖儀車上「幽會」，戴祖儀及丁子朗亦於IG澄清二人僅是好朋友。近日，丁子朗接受商台節目《星光背後》訪問時就再次表示與戴祖儀沒有可能，而林宣妤就係好好嘅朋友。丁子朗又透露自己拍過3次拖，入行後先後有過兩段關係，一段係圈外人、一段係圈中人，不過就唔肯講出對方身分；丁子朗又指，希望未來拍拖對象可以係圈中人，因為可以互相體諒與明白大家嘅工作，唔想因為對方係圈外人唔體諒佢嘅工作而產生磨擦。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！