錢慧儀離婚︳家人一度反目 錢父跪女追首期 細佬疑濫藥猝死

1981年港姐亞軍錢慧儀尋日宣布同名流馬清揚離婚。早年馬清揚錢慧儀多次傳過婚姻亮起紅燈,最終都係分開收場。除此之外,錢慧儀歷年來多次因為家事而見報,母親同細佬亦離世,令人感慨。

錢慧儀成為名媛後,最多都係ball場版見到佢嘅身影。但喺1998年,錢父錢志強為咗追討150萬買入半山嘉兆臺豪宅首期,喺女兒山頂道大宅門口連續下跪6日,錢父更話冇錢供樓隨時瞓街,成為娛樂版頭條。錢慧儀為此非常激動,踢爆父母不停向佢攞錢,馬清揚亦指責外母係「下跪事件」幕後主腦,外父只係「演員」。

進一步令錢慧儀同父母關係惡化嘅,係2001年錢慧儀細佬懷疑因為濫藥暴斃一事。當時有報導指錢慧儀認為係家事影響細佬,錢家三口關係頓入冰點,錢慧儀多年冇同父母聯絡。

後來錢慧儀同父親和好恢復聯絡,不過2009年錢母逝世,錢慧儀受訪時顯得哀傷,而馬清揚亦幫外父手籌備葬禮。