錫住湯洛雯 拒先有後婚 馬國明：有意外再公布

藝人馬國明為本周將大結局的無綫劇《寶寶大過天》再谷宣傳，昨日瞓身體驗媽媽生產時的陣痛，揚言希望先結婚後生仔，除非有意外才再作公布。

《寶》劇本周五將播映大結局，一眾藝人昨日現身電視城宣傳，包括馬國明、商天娥、龔慈恩、吳岱融、黃文意等，男女分組玩「媽媽初體驗」遊戲，5位女藝人利穎怡、張詩欣、朱斐斐、吳沚默和葉蒨文齊齊裝假肚及玩健體運動；而馬國明和吳岱融在腹部貼上儀器，一嘗孕婦生產時的陣痛滋味，吳岱融痛到標汗叫停，至於馬國明則面不改容。

睡眠不足肌肉流失

馬國明受訪時，表示上星期收視又升，對於勝過《刑偵日記》，他認為不同時段不能作比較，接受觀眾睇劇習慣改變，認為收視都要講運氣。玩遊戲感受完媽媽生產陣痛後，笑言男人若可以生仔，便可感受母愛偉大：「如果可以生，我唔介意去試吓偉大神聖嘅工作。」問到何時真正造人？他希望先結婚後生仔：「應該唔會有咗先結，正常嚟講，有意外再公布，佢（女友湯洛雯）都好忙，拍緊《雙生陌生人》，未拍完就要過組，再有另一部mark咗，佢忙過我，拍到12月。」現正忙於拍攝劇集《隱形戰隊》的他愈忙愈瘦，因睡眠不足致肌肉流失，要請教陳山聰和林子善如何作出補救。

利穎怡未計劃生育

早前爆出已為人妻的利穎怡，透露已婚2年，夫婿是圈外人，從事銀行業，她說：「今日（昨）係我哋拍拖10周年，生育未有計劃，等天安排，我鍾意玩小朋友多啲，可能到時搵奶奶湊，因為我媽咪住加拿大，疫情下都返唔到嚟。」