鍾培生主辦拳賽加碼搵劉馬車對龍心 4個拳手3個犯事 霍哥︰我先係最唔正常

鍾培生主辦嘅《培生擂台無敵盃2023》喺12月1舉行，尋日舉行嘅記者會上，除咗有一早宣布會對打嘅前微辣成員霍哥（霍俊邦）同周永恆之外，同時宣布另一個矚目戲碼 － 人稱「龍馬精神」嘅劉馬車（劉駿軒）同龍心將會喺擂台對陣，wow～

上次記者會Face Off環節，周永恆「成功」撩起霍哥把火，上演一場疑幻疑真嘅隻揪場面。今次呢？4位選手都係企定定影下相，最多都係劉馬車同龍心除衫。曾被稱為「維園霆鋒」嘅龍心，身型睇落未收水仲有少少肚腩，但谷起上嚟竟然乍現鋼條身型，同真．謝霆鋒有得揮，劉馬車嗰副排骨仔身型當堂被比下去。

霍哥受訪時話自己係4個參賽者入面最唔正常嗰個，因為佢喺後台發現另外3位溝通到，而自己我完全聽唔明佢哋講乜。的確，霍哥同其他3位嘅不同之處就係冇犯過事 － 周永恆早排因「抗拒執行職責的警務人員」同「襲擊執行職責的警務人員」被判即時入獄兩星期；龍心上個月俾廉署落案起訴，指佢涉嫌企圖欺詐三萬元選舉開支，下月10日再提堂。劉馬車更加唔使講，官非file成呎厚，刑事恐嚇、襲擊致造成身體傷害、猥褻之外，仲北上兩度犯下風化案而多次入獄。

照咁睇，霍哥你真係與別不同。而霍哥對住周永恆雖然有身高優勢，但都認真備戰，而家每星期練拳5日，另加跑步同游水練體能，甚至戒埋煙。為咗專心準備，霍哥自言亦冇同舊公司微辣嘅老細六毫子、舊同事加蔥聯絡。

更生人士之一周永恆剛剛重投社會，佢話獄中受保護住單人倉，每日娛樂係睇書，仲話睇完《倚天屠龍記》，不過佢就大彈監獄伙食同s一樣！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！