陰目偵信｜193收騷擾訊息宣布今後唔出席謝票：謝票並唔係義務

近年，香港電影興起謝票活動，導演及一眾演員都會落力為電影造勢而四出謝票，既可以同觀眾及粉絲接觸，又可以谷票房。由ERROR四子主演嘅電影《陰目偵信》 喺上星期正式公映，一班戲中演員馬不停蹄展開謝票行程，不過ERROR成員193（郭嘉駿）喺前晚（14日）於官方TG群組表示因出席謝票活動而收到騷擾訊息，所以決定今後唔會為電影謝票。

ERROR成員193（郭嘉駿）憑敢言、騎呢搞笑及靚仔形象出位，過往亦多次因出位言論而惹上是非。喺前晚佢喺官方TG群組宣布今後唔會再謝票：「各位，收到啲好騷擾嘅message，所以同大家解釋返。謝票並唔係義務，我亦都冇應承過任何嘢。身為一個配角已經做足晒戲劇上嘅本分，亦希望大家買飛入戲院係帶住一個想睇電影嘅心情入去。而最近一個月我身體狀況一直好差，恆常工作再加上我好快要出trip拍嘢同埋舞台劇排練，所以一有時間就以去趕工做新歌，否則今年內出唔到第二首solo。如果唔係你哋包場，其實我真係唔太想抽時間去謝票，有空閒時間我會比較想休息、養聲同埋做歌，帶多啲新作品俾大家。既然原來抽時間去謝票係會收到騷擾mesage，今後我決定唔再謝票。不過請大家繼續大大力支持陰目偵信呢套電影，推介俾身邊嘅朋友，thank you!」

193宣布呢個消息後，唔少群組內嘅粉絲都紛紛留言「take care33」、「33 保重身體 多啲休息」、「睇得出你好攰，真心多謝你嘅出現，請你好好休息，期待你嘅新歌同舞台劇」、「33 take care ar 唔好嬲豬，好好休息吓」、「33加油，你出唔出現謝票場都會支持，最緊要保重身體」、「真心fans唔會DM騷擾你，反而會擔心你係咪休息唔夠，身體有冇唔舒服等等。33請唔好為愛惜你嘅人傷心難過，你知道清楚自己嘅狀況，照顧好自己，專注做好自己嘅作品，對支持你嘅人就係最大嘅回報。加油呀！」、「33我地支持你，d無謂人唔好理，睇我地支持你就夠，多謝你抽空出席包場呀！」及「其實謝票只係bonus，你去唔去到都好，都會一樣買飛支持。身體健康最緊要，33 take care」等等。

另外，根據《陰目偵信》官方貼文，電影喺8月12日一共有10場謝票場，而出席演員就有何啟華 Dee, 郭嘉駿 193及郭思，不過有粉絲指Dee及193出席完第一場謝票場後便缺席，搞到唔少專誠買飛見偶像嘅粉絲非常失望及感到不被尊重，更有粉絲留言希望官方解釋二人失場嘅原因，及有人到193群組留言滋擾。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！