陳健安On仔疑仿真草場地踢波致十字韌帶斷裂：心諗咁易咩？

陳健安（On仔）繼早前遇交通意外整親右邊面，因為唔想化妝令傷口遲康復而直接貼膠布拍攝新歌《之後的一天》MV；日前又再於踢波時整親膝頭哥，表示照咗X-ray，骨無事但要待消腫後先可以照MRI檢查半月板及韌帶。昨日（29日），On仔就喺社交平台貼出數張踢波照及受傷過程的短片，表示MRI報告已經出咗，原來係左腳前十字韌帶完全斷晒，而其他組織就無大傷：「唉，無諗過人生第一次傷膝條前十字咁就斷晒，係完全斷晒。」

On仔分享自己受傷及聽到MRI報告後嘅心情，曾經好唔開心及自責：「一聽到嗰刻好唔開心，想喊出嚟，心諗咁易咩？動作都好平常姐。」On仔又思考其受傷原因：「過程當中身邊都會有好多說話令到自己將責任放大同放晒喺自身上，好自責好唔開心，例如年紀大機器壞、訓練唔夠、熱身不足、去完非洲返嚟舟車勞頓唔夠休息等等。自問以上都做足，但當然唔可以排除上述嘅因素。」直至與物理治療師討論後先覺得好過啲，認為其中一個無乜考慮嘅外在因素就係場地同波boot：「佢哋聽過唔少膝頭受傷嘅人係喺仿真草上整親，視乎係第幾代仿真草場，我都唔太識，但我係喺顯田仿真草足球場整親，第一次踢呢個場，著短膠粒釘boot，整親嗰刻覺得隻腳有啲啜住咗喺地，然後膝頭就擺一擺就傷咗。」On仔表示有啲無奈同疑問，更反問有冇邊個部門係負責收集球場受傷嘅數及研究改善，以減低再有人受傷嘅機會。

對於受傷，On仔直言每次受傷或者病，都覺得係身體畀佢嘅一種啟示；「我都相信係身體叫我好好關心吓佢，將注意力放返喺自身，今年能量睇嚟都用得7788，叉叉。」On仔最後除咗感謝當日有嚟睇波支持佢嘅族人，更不忘搞笑地宣傳即將推出嘅大碟：「喺最壞嘅時候報個喜，沖一沖，我人生首張個人概念大碟會喺2023年12月11日出世。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！