陳子聰大病過後首度上台演出「飲啖水都係Luck」 老婆何超儀揸柺杖撐場

前年喺澳洲因嚴重內出血一度命危嘅陳子聰，經老婆何超儀悉心照料之下已經恢復狀態。尋日陳子聰更加以組合廿四味成員身份，參與西九舉行嘅《The Wild Ones Music Festival》戶外音樂節。子聰睇落相當醒神，廿四味演出嘅5首歌佢全數參與，觀眾反應相當熱烈，一眾隊友都喺台上同子聰攬埋一舊。而身為音樂節搞手之一嘅子聰老婆何超儀，即使腳傷未癒都揸柺杖撐場，興起時甚至高舉柺杖。

原來陳子聰有大約4年冇參與廿四味演出，今次上台覺得開心同緊張，佢又話自己身體一好返啲就諗幾時上台演出。至於身體狀況，子聰話暫時OK，「慢慢嚟囉，人生可以一步還一步」。而家子聰飲食好清淡，自言經歷過一啲階段後會感恩會乖，覺得有得睇live甚至「飲啖水都係luck」。何超儀去年接受Do姐訪問提到陳子聰病情，成為全城話題，子聰話香港人充滿愛，周不時喺街都有人祝福佢早日康復，又提醒佢小心身體。

而何超都感謝香港人對子聰嘅祝福，又大讚老公上台表現幾好，仲話自己說服到老公放返把頭髮先上台，甚至誇獎對方「我老公本身係天生冇可能醜嘅人」。

何超儀去年接受Do姐訪問，首度披露老公病情。一度肝臟有事嘅陳子聰，前年10月去澳洲探父母，有日要揸車送人去醫院，點知去到急症室車都未泊好就暈咗。醫生發現陳子聰大動脈爆裂嚴重內出血，要開肚做手術，但係一打開腹腔「啲血已經流到一地都係」。

本來身在韓國出席影展嘅何超儀立即飛到澳洲照顧陳子聰，試過每日食好多嘢兼著多件衫，等自己雙手暖啲再為老公按腳。後來醫生為陳子聰換上人工血管先得以保命，前年12月由何超儀安排醫療包機送返港。早前何超儀透露子聰完成造口手術，形容老公好返晒，四月去美國做多次手術就搞掂。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！