陳敏之帶貨直播再被王怡然追債留言洗版 王父再被爆有私家農場？

今屆港姐亞軍王怡然當選後負面新聞一浪接一浪，先被爆參選前拍過片惡形惡相鬧香港餐廳侍應，再被揭發喺內地經營補習社嘅父母，涉嫌拖欠薪金兼呃家長錢，仲夾帶私徒帶埋個女嚟香港避風頭。本來港姐得獎後有好多頒獎活動要去，但王怡然近排聲稱「因病請假」，到今日先會再出席活動。

王怡然家人「走數」新聞除咗影響港姐名聲之外，連帶TVB喺內地嘅「帶貨直播」都受影響，日前陳自瑤主持嘅直播被向王怡然追債嘅留言洗版，Yoyo更被指一度黑面。而最新「苦主」輪到陳敏之，佢日前嘅帶貨直播同樣被追債留言灌爆，相信近排致力發展內地電商業務嘅TVB要諗計應付。

而王怡然老豆王召君日前發文道歉，強調會打工同創業搵錢還債，但網民完全唔收貨，更踢爆王召君一家在港租住月租3萬港元嘅單位。今日再有內地網民聲稱，王召君旗下嘅公司，喺北京擁有一個佔地五百幾畝嘅農場。農場更有個牌解釋成立原因，係因為場主希望女兒食到安全食材，於是喺2011年收購農場。網民更稱農場仍然營業中。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！