陳蕾演唱會反應兩極 翻唱王菲《夢中人》被批唔掂 周啟生評價：離晒譜咁走音

陳蕾首個個人紅館演唱會《念》昨日（5日）圓滿結束，演唱會分成五個主題：「死」、「惑」、「念」、「生」，「能屈能伸」，為觀眾帶來聽覺享受與視覺效果。不過，陳蕾演唱會反應兩極，有網民覺得陳蕾「中槍」淌血和「瞓棺材」畫面配合歌曲演繹相當震撼，但有網民就不解點解首場要請去年退出《全民造星V》決賽嘅Nathan（魏念恩）當其中一位嘉賓彈奏樂器；陳蕾亦於首場表示自己會擁抱瑕疵，唔會用科技令聲音變得完美，走音就由佢走，網民對陳蕾嘅「走音論」有微言，指佢以人性和情緒等原因將走音合理化。

陳蕾入行14年，今年年初獲得《叱咤樂壇我最喜愛的女歌手》及《叱咤樂壇女歌手》金獎獎項，但對於陳蕾嘅唱功，網民有讚有彈，尤其係翻唱王菲《夢中人》一曲被指唱得好唔穩定：「唱得又flat又走音拍子又唔準，緊張唱唔到同本身handle唔到係聽得出，而事實就係後者」、「唔知做乜chok聲」、「終於開始反陳蕾」、「條友根本唔多掂，翻唱乜衰乜」、「陳蕾唱王菲首夢中人真係好難聽呀」、「佢唱歌堅難聽根本rock唔起，咬字好似含住啲嘢咁」等等，不過都有網民指王菲嘅歌係難唱，原唱太好：「明顯唔可以叫好聽。唉，唱到曬啲音算係咁啦」、「王菲係好難超越得到」、「王菲天后級，點比」等等。

音樂人周啟生亦於社交平台分享對陳蕾現場表演嘅評語：「有朋友send咗一啲links俾我，係一個女仔嘅演唱會，女歌手叫陳蕾。我之前曾經聽過一兩隻佢嘅歌，聽唱片製作又真係幾好聽！ 音樂，歌詞，唱歌都係合格嘅！ 但係聽佢現場嘅表演，真係嚇咗我一跳，彈結他甩皮甩骨，唱歌近乎離晒譜咁走音。如果我冇記錯，早排佢攞咗最受歡迎嘅女歌手獎。」周啟生指無心將陳蕾攞嚟評頭品足，但就詢問一眾網民對於陳蕾今次演唱會嘅表現如何；又回應陳蕾嘅「走音論」：「擁抱瑕疵，拒用科技，咁屙完屎抆唔抆屎？屙屎唔抆屎，為咗慳廁紙，講來講去兩個字，無恥無恥極無恥。」有唔少網民同意周啟生嘅講法：「演唱會啲片走晒音，真係好難聽」、「這位陳蕾女歌手，因本身聲底唔係咁厚，所以假音同高音真係失色咗，表演時有啲勉強，網上評論過，俾人話我Old Seafood唔識欣賞」、「真係好普通，如果叻唔使到今時今日先彈出嚟」、「我第一次聽佢唱歌係佢啱啱攞咗一個榜嘅冠軍，嚇到差啲暈低」等等，有網民留言陳蕾係當今比較好嘅歌手，周啟生回應對方指：「你雖然唔係好靚仔，都唔算係樣衰啦！係咪咁意思呀？」，又表示夾硬俾藉口原諒對樂壇嘅興衰無幫助。

至於，有到場睇陳蕾演唱會嘅黃耀明和梁祖堯就公開大讚陳蕾，黃耀明表示流行樂壇未來係屬於陳蕾：「流行樂壇已經改朝換代，很多歌手已經不是生產線合成出來的。這一代的歌手有很多自己的想法，很多自己的話要講，所以我冇掛住影相，我很專心去睇、去聽去感受台上的一切，以免辜負歌手、樂手和製作團隊的努力。（其實台上好多嘢睇好多嘢聽）『世界與你無關』其實是反話。我覺得你對世界和人類都愛得很深，所以觀眾都很愛你，未來是屬於你的，陳蕾。」；梁祖堯又出PO讚賞陳蕾演唱會好好睇，亦係近年睇過最好睇嘅紅館演唱會：「冇嘢，可以挑剔。 滿分。 勇敢赤裸，真誠動人」陳蕾對二人嘅賞識均有回覆，表示多謝佢哋，而黃耀明再次回應陳蕾，表示：「你好叻啊。加油！」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！